काठमाडौं । प्रतिनिधि सभामा प्रमुख प्रतिपक्षी दलका नेता केपी शर्मा ओलीले गठबन्धन सरकार चरम अनुत्तरदायी, गैरजिम्मेवार र स्वेच्छाचारी बनेको बताउनुभएको छ ।
मंगलबार प्रतिनिधि सभा बैठकमा बोल्दै ओलीले सरकार विकास विरोधी भएको बताउनुभयो । ‘विकासका कामलाई ठप्प पारेका छन्, चलिरहेका आयोजनाहरू रोकिएका छन्, काम गरिसकेका आयोजनाहरूलाई भुक्तानी दिइएको छैन, भुक्तानी नदिएपछि भयावह स्थितिको सिर्जना भएको छ’, ओलीले भन्नुभयो ।
सरकारले रकम भुक्तानी नदिँदा व्यवसायीहरू ऋण तिर्न नसकेर बैँकको कालो सूचीमा परेका उहाँले बताउनुभयो । सरकारको कारण देशको आर्थिक अवस्था कमजोर भएको उहाँले प्रष्ट पार्नुभयो ।
मुस्कान खातुन माथि एसिड छर्नेलाई मुस्कानको घाउ निको नहुँदै सरकारले छाडेको भन्दै उहाँले आलोचना गर्नुभयो । एसिड आक्रमणको पीडितलाई उपचार गर्न नसक्ने तर अपराधीलाई छाड्ने काम सरकारले गरेको उहाँले बताउनुभयो ।
सरकारले सुशासनको अभियान चलाउँदा त्यसलाई रोक्न विरोध लागेको भनि गृह मन्त्री नारायणकाजी श्रेष्ठले भाषण गर्दै हिँडेको प्रति पनि ओलीले प्रश्न गर्नुभयो । कुन विरोधी सुशासनको अभियान रोक्न लाग्यो ? भन्दै उहाँले प्रश्न राख्नुभयो ।
पक्राउ परेको सुन ढाकछोप गर्न गृह मन्त्री आफैँ लागेको ओलीले बताउनुभयो । छानबिन गर्ने आयोग बनाउन समेत एक महिना लडाइँ गर्नुपरेको उहाँले स्मरण गराउनुभयो । ओलीले विमानस्थलबाट निकालेर बाटोमा सुन पक्राउ गरिएको भए पनि सुन लिएर जाने मानिसलाई हाजिर हुने गरी छाड्नको कारण उहाँले माग गर्नुभयो । ‘सुशासनको अभियान भनेको यही हो ? राजनीतिको अपराधीकरण’, उहाँले भन्नुभयो ।
लैनचौरको स्काउटको जग्गा सरकारको संरक्षणमा एउटा व्यक्तिले कब्जा गरेको प्रति पनि उहाँले प्रश्न गर्नुभयो । बाहुबलको आधारमा सरकारी जग्गा कब्जा गर्न पाइन्छ कि, पाइँदैन ? भन्दै उहाँले प्रश्न गर्नुभयो ।
बिच दिउँसो सडकमा लखेटी लखेटी मान्छे काट्ने अपराधीलाई छाड्ने काम सरकारले गरेको ओलीले बताउनुभयो । सरकारको आलोचना गर्यो भने सांसदहरूलाई नै पक्राउ गर्ने र पक्राउपूर्जी जारी गर्ने काम गरिएको भन्दै ओलीले आक्रोश व्यक्त गर्नुभयो । ‘सांसदहरूको पनि सातो लिने, कोही बोल्यो कि खबरदार, सुनिल शर्मा बनाइदिन्छौँ, अर्को बनाइदिन्छौँ, सांसदहरूको सातो लिन खोजको होइन ? तर्साउन, थर्काउन खोजको होइन ? अनि सुशासनको कुरा गर्ने’, उहाँले भन्नुभयो ।
सरकार राष्ट्र हित र जनहित विरुद्ध लागेको उहाँले बताउनुभयो । यो कुरा तथ्य प्रमाणले पुष्टि गर्ने ओलीले बताउनुभयो । सरकार अस्थिरता र विद्वेष फैलाएर सत्तामा टिक्नको लागि जे पनि गर्ने अवस्थामा पुगेको उहाँले टिप्पणी गर्नुभयो ।
सरकार सरकारमा रहेका नेताहरू आफ्नो स्वार्थ पूरा गर्नका लागि जस्तोसुकै काम गर्न पनि तयार रहेको ओलीले बताउनुभयो । सरकार स्वयम् संविधान असफल गराउने प्रयत्नमा लागेको ओलीको भनाइ छ । ‘सरकार गठबन्धन बाहेक अन्य दलको अस्थित्व स्विकार्दैन, प्रतिपक्षी दलको नेता माथि सांघातिक आक्रमण गर्ने प्रयास गर्छ’, उहाँले भन्नुभयो ।
आफू माथि आक्रमण गर्ने हमलाकारीलाई केही पनि नगर्नु भन्ने आदेश दिएर सरकारले छुटाएको ओलीले बताउनुभयो । हिंसालाई प्रोत्साहित गर्ने काम सरकारले एक ठाउँमा होइन अनेक ठाउँमा गरेको आलीले उदाहरण दिनुभयो ।
