काठमाडौं । प्रतिनिधि सभा सदस्य डा. अमरेशकुमार सिंहले देशको अवस्था जटिल भएको बताउनुभएको छ ।
मंगलबार प्रतिनिधि सभा बैठकमा बोल्दै देशको जटिलताको कारण गठबन्धन सरकार भएको सिंहले बताउनुभयो । ‘जटिलताको कारक सत्ता गठबन्धन र सरकार हो’, उहाँले भन्नुभयो ।
बैठकमा बोल्दै सिंहले परीक्षामा फेल हुनेलाई न्यायाधीश बनाएको भन्दै सरकारको आलोचना गर्नुभयो । एक जना लिखित पास गर्नेलाई भने सरकारले मर्यादाक्रममा तल हालिदिएको सिंहले बताउनुभयो ।
सरकारले डाक्टर बन्नेले कुटाई खानुपर्छ भन्ने म्यासेज दिएको सिंहले बताउनुभयो । ‘यो डाक्टरको देश हुन सक्दैन, प्रोफेसरको देश हुन सक्दैन, जो हत्या गर्छ त्यसलाई राष्ट्रपतिले ससम्मान बिदाइ गर्छ’, उहाँले भन्नुभयो ।
राष्ट्रपतिलाई संविधानभन्दा माथि जाने अधिकार नभएको बताउँदै उहाँले कानुनको शासनमा अपराधी अपराधी नै हुने बताउनुभयो । विगतदेखि नेपाललाई मजदुरहरूको देश बनाउन खोजिएको भन्दै उहाँले सरकारको आलोचना गर्नुभयो । डाक्टरको देश होइन, प्रोफेसरको देश होइन, शिक्षितको देश होइन’, उहाँले भन्नुभयो ।
दलीय भागबण्डामा जे पनि गर्ने छुट नभएको उहाँले बताउनुभयो । मरेको भूत प्रेतको पनि भोट खसाएर सदर गरिदिए बापत कानुन मन्त्रीले आफ्नो निर्वाचन क्षेत्रमा खटिनुभएका निर्वाचन अधिकृतलाई न्यायाधीश बनाइदिनु भएको सिंहको भनाइ छ । मन्त्री नबन्दासम्म देश र जनताको लागि काम गर्ने बताउने कानुन मन्त्री अहिले असक्षम र अपराधीको लागि काम गर्न व्यस्त रहेको भन्दै उहाँले आलोचना गर्नुभयो ।
अहिले देशमा जातीय र धार्मिक दङ्गा भड्किएको भन्दै सिंहले त्यो पनि सरकारकै कारण भएको बताउनुभयो । ‘सरकारको संलग्नतामा छ, यो सरकार माथि आरोप गर्छु र आरोप प्रमाणित गर्छु, सरकारको संलग्नतामा देशलाई जातीय र धार्मिक दङ्गामा फसाएर देशलाई बरबाद पार्न खोजिँदै छ’, उहाँले भन्नुभयो ।
देश जलाएर सरकारमा बस्नेहरू तलब भत्ता खाएर बसेका भन्दै उहाँले आलोचना गर्नुभयो ।
