काठमाडौं । प्रतिनिधि सभा सदस्य महेश बर्तौलाले त्रिभुवन विश्वविद्यालयमा प्राध्यापक र सहप्राध्यापक नियुक्तिको लागि चलिरहेको अन्तरवार्ता नेपाल विद्यार्थी संघले रोकेको भन्दै आपत्ति जनाउनुभएको छ ।
शुक्रबार प्रतिनिधि सभा बैठकको शून्य समयमा बोल्दै प्रमुख प्रतिपक्षी दलका सचेतक समेत रहनुभएको बर्तौलाले अन्तर्वार्ता चलिरहँदा सत्तारुढ दल नेपाली कांग्रेस निकट विद्यार्थी संगठनले विश्व विद्यालय सेवा आयोगमा ताला लगाएर परीक्षा रोक्न फर्मान जारी गरेको भन्दै आपत्ति जनाउनुभएको हो । ‘हिजो दिउँसो नेविसंघले तालाबन्दी गर्यो र आदेश जारी गर्यो, घोषणा गर्यो– यो अन्तर्वार्ता लिन पाइँदैन’, उहाँले भन्नुभयो ।
अन्तर्वार्ता लिन आउने प्राध्यापक र परीक्षा दिन आउनेलाई गेटबाटै फर्काउने फर्मान नेविसंघले जारी गरेको बर्तौलाले बताउनुभयो । सत्तारुढ दलकै विद्यार्थी संगठनबाट यस्तो कार्य भएको भन्दै उहाँले आलोचना गर्नुभयो ।
