काठमाडौं । प्रतिनिधि सभा सदस्य डा. सुनिल शर्माले कुनै बेलाका मास्टरले नै देशको नेतृत्व गर्दा पनि मास्टरहरू सडकमा आउनु पर्ने विडम्बनापूर्ण स्थिति रहेको बताउनुभएको छ ।
शुक्रबार प्रतिनिधि सभा बैठकमा शिक्षा विधेयक माथिको सैद्धान्तिक छलफलमा बोल्दै शर्माले अहिलेका प्रधानमन्त्री पुष्पकमल दाहाल प्रचण्ड कुनै बेला शिक्षक नै भएको स्मरण गराउनुभयो । ‘एउटा शिक्षक जो आज प्रधानमन्त्री बन्नुभएको छ, एउटा शिक्षक जो आज राज्यको नेतृत्व गर्दै हुनुहुन्छ, अर्को सँगैको साथी शिक्षक आफ्नो जागिर, जोगाउन र गाँस, बाँस कपालको लागि खागीको झोला भिरेर हात्तीछाप चप्पल लगाएर सडकमा छ’, उहाँले भन्नुभयो ।
देशको प्रधानमन्त्री करोडौँका घडी लगाएर हिँड्ने तर शिक्षक हात्तिछाप चप्लल लगाएर सडकमा आउनु पर्ने अवस्था रहेको शर्माले बताउनुभयो । ‘प्रचण्डले लगाउने २ करोडको या ६५ लाखको घडी र उहाँकी छोरीले बोक्ने गुची ब्यागलाई लिलामीमा राखेर नेपालको दूर दराजको स्कुलहरूमा अहिले टिनका छाना प्वाल परेका छन्, बच्चाहरूले पढ्न पाएका छैनन्’, उहाँले भन्नुभयो ।
जनयुद्ध हाँकेर आउनुभएको प्रचण्डको परिवारको सम्पत्तिलाई बिक्रीमा राखिदिनुभयो र दूर दराजको स्कुलमा हालिदिनुभयो भने नेपाली जनताले राम्रोसँग पढ्न पाउने उहाँले बताउनुभयो । उहाँले प्रचण्डलाई ठुलो छाती गरेर यो काम गर्न शर्माले आग्रह गर्नुभयो ।
