काठमाडौं । प्रतिनिधि सभामा प्रमुख प्रतिपक्षी दलका प्रमुख सचेतक पदम गिरीले इजरायलमा रहेका नेपाली नागरिक प्रति सरकारलाई गम्भीर हुन ध्यानाकर्षण गराउनुभएको छ ।
आइतबार प्रतिनिधि सभा बैठकमा बोल्दै गिरीले हमासको आक्रमण परी केही नेपाली घाइते भएका र केही सम्पर्कमा नआएका विषयमा सरकारले तत्काल कूटनीतिक पहल थाल्नु पर्ने माग गर्नुभयो । एउटा विज्ञप्ति जारी गरेर सरकार उम्कन नमिल्ने भन्दै गिरीले प्रधानमन्त्रीले तत्काल त्यहाँका प्रधानमन्त्रीलाई फोन गर्नुपर्ने बताउनुभयो । ‘हाम्रा नागरिकको छिटो भन्दा छिटो उद्धार हुनु पर्यो, जीवन रक्षा हुनु पर्यो, उपचार हुनु पर्यो’ गिरीले भन्नुभयो ।
इजरायलमा रहेका नेपालीको जीवन रक्षाको काममा सबै क्षेत्रबाट लाग्नु पर्नेमा उहाँले जोड दिनुभयो । अहिले यूएनको बैठक समेत चलिरहेकोले त्यहाँ पनि कुरा उठाउनु पर्ने उहाँले बताउनुभयो ।
इजरायलमा रहेका नेपाल फर्कन चाहने नेपालीलाई समन्वय गरेर चार्टर जहाजबाट भए पनि नेपाल ल्याउने व्यवस्था मिलाउन उहाँले आग्रह गर्नुभयो ।
फरक प्रसङ्गमा नेपालगञ्जमा व्यक्ति हत्याको आरोपमा जन्मकैदको फैसला सुनाइएको व्यक्तिलाई सरकारले कैद माफी दिने काम गरेको भन्दै यसले मुलुकमा विधिको शासन अन्त्य गरिदिएको गिरीले बताउनुभयो । राजनीतिक दलमा लागेका मानिसलाई कुनै कानुन लाग्दैन भन्ने स्थिति सिर्जना भएको उहाँको भनाइ छ । अपराधीलाई सरकाले छाड्दै जाने हो भने अदालत र कानुन किन चाहियो ? भन्दै उहाँले प्रश्न गर्नुभयो ।
सरकारले अपराधी छाड्न सिफारिस गर्ने र राष्ट्रपतिले छाड्दै जाने हो भने देश कहाँ जान्छ ? भन्दै उहाँले प्रश्न गर्नुभयो । सरकारले गरेको यो निर्णय तत्काल सच्चिनु पर्ने उहाँले माग गर्नुभयो ।
