काठमाडौं । प्रतिनिधि सभा सदस्य रवि लामिछानेले नेपाली भूमिमा भारतीय प्रधानमन्त्री आउँदा नेपाललाई जानकारी नदिएको भन्दै आपत्ति जनाउनुभएको छ ।
बिहीबार प्रतिनिधि सभा बैठकमा आकस्मिक समय माग्दै लामिछानेले नेपाली भूमि गुञ्जीमा भारतीय प्रधानमन्त्री नरेन्द्र मोदी आउँदा सरकारले कुनै स्वागत नगरेको र जानकारी समेत नदिएको बताउनुभयो । यति ठुलो भ्रमण आफ्नो भूमिमा भारतका प्रधानमन्त्रीको हुँदा सरकारले जानकारी गराउनु पर्दैन ? भन्दै उहाँले प्रश्न गर्नुभयो ।
नेपालको चुच्चे नक्साको भूभागमा आएका कुनै पनि मुलुकका प्रधानमन्त्रीलाई नेपालले स्वागत गर्न पाउनु पर्ने र त्यसको जानकारी सरकारले दिनु पर्ने उहाँले माग गर्नुभयो ।
भारतका प्रधानमन्त्री नरेन्द्र मोदी भारतले अतिक्रमण गरेको नेपाली भूमि दार्चुलाको कालापानी स्थित गुञ्जिको यात्रामा जानुभएको हो । मोदीले कालापानी क्षेत्रको भ्रमणको क्रममा आदिकैलाश र पार्वतीकुण्डको दर्शन गर्ने बताइएकाे छ । नेपाली भूमि मिचेर भारतले मान सरोवर जाने सडक बनाएको छ ।
नेकपा एमालेका अध्यक्ष केपी शर्मा ओली प्रधानमन्त्री भएको बेला भारतले मिचेको कालापानी, लिपुलेक लगायतको भूभाग समेटी चुच्चे नक्सा जारी गरेको थियो । राजनीतिक रूपमा नक्सा जारी भए पनि सो भूमि अझै नेपालले भोग चलन गर्न पाएको छैन ।
