काठमाडौं । प्रतिनिधि सभा सदस्य अर्जुननरसिंह केसीले नेपाली समाजमा सामाजिक सद्भावना र सहअस्तित्व विचलन हुँदै गएको बताउनुभएको छ ।
बिहीबार प्रतिनिधि सभा बैठकमा बोल्दै सामाजिक सद्भाव र सहअस्तित्व संकटमा पर्दै गएको उहाँले बताउनुभयो । ‘अन्तरजातीय सद्भावना र धार्मिक सहिष्णुता हाम्रो राष्ट्रिय संस्कार र संस्कृति हो, त्यसलाई तोड्ने काम हुँदै छ’, उहाँले भन्नुभयो ।
विभिन्नता बिचको एकता नेपाली संस्कृति भएको बताउँदै उहाँले त्यो पतन हुँदै गएको बताउनुभयो । अराजकताको विरुद्ध अराजकता समस्याको समाधान नभएको उहाँले बताउनुभयो । यस्तो बेलामा आवेगले होइन विवेकले काम गर्नुपर्नेमा उहाँले जोड दिनुभयो ।
सामाजिक सञ्जाल मार्फत उत्तेजना फैलाउने काम भएको भए पनि सरकारले त्यसलाई नियन्त्रण गर्न नसकेको भन्दै उहाँले आलोचना गर्नुभयो । यदि त्यसलाई नियन्त्रण गर्न सकेको भए यो स्थिति नआउने उहाँको भनाइ छ ।
दशैँ, तिहार, छठ लगायतका पर्वका मुखमा महँगी आकासिएको उहाँले बताउनुभयो । सरकाले महँगी नियन्त्रण गर्न नसकेको भन्दै उहाँले आलोचना गर्नुभयो ।
सरकारले निर्माण व्यवसायीको रकम भुक्तानी नगर्दा सामान्य श्रमिकले समेत भुक्तानी नपाएको उहाँले बताउनुभयो । निर्माण व्यवसायीको रकम तत्काल भुक्तानी गर्न उहाँले सरकारसँग माग गर्नुभयो ।
स्थानीय तहका कर्मचारी दशैँको मुखमा काठमाडौँमा आन्दोलनमा रहेको प्रति पनि उहाँले सरकारको ध्यानाकर्षण गराउनुभयो ।
जनतामा असन्तुष्टि भुसको आगो जस्तै सल्किएको प्रति उहाँले सरकालाई सचेत हुन आग्रह गर्नुभयो । अहिले देशको अवस्था कहालीलाग्दो भएको उहाँले बताउनुभयो ।
