काठमाडाैं । राष्ट्रिय प्रजातन्त्र पार्टी (राप्रपा) ले काेशी प्रदेशका नवनियुक्त मुख्यमन्त्री केदार कार्कीलाई विश्वासको मत नदिने भएकाे छ ।
बुधबार विराटनगरमा बसेकाे प्रदेश सभा बैठकमा मुख्यमन्त्री कार्कीले राख्नुभएकाे विश्वासको मतसम्बन्धी प्रस्तावमाथिको छलफलमा भाग लिँदै राप्रपा काेशी प्रदेश संसदीय दलका नेता भक्ति सिटौलाले विश्वासकाे मत नदिने बताउनुभयाे । काेशीमा राप्रपा प्रतिपक्षमा बस्ने उहाँले प्रष्ट पार्नुभयाे ।
नेता सिटाैलाले काेशीकाे विकास र समृद्धिका लागि सबै एकजुट हुनुपर्ने बताउनुभयाे । प्रदेशलाई स्थिर बनाउनेतिर लाग्न उहाँले मुख्यमन्त्री कार्कीलाई आग्रह गर्नुभयाे ।
संविधानको परिधिभित्र रहेर प्रदेशको नामांकन गरिएकाे स्मरण गर्दै नेता सिटाैलाले त्यसबेला सहमति गरेर अहिले भाँड्ने काम नगर्न गठबन्धन दललाई चेतावनी दिनुभयाे । ताक परे तिवारी नत्र गाेदामे प्रवृत्ति नदेखाउन उहाँले माओवादी केन्द्र लगायत दललाई चेतावनी दिनुभयाे ।
संविधानसम्मत रुपमा गरिएकाे प्रदेशकाे नामाकरणमा परिवर्तनकाे आवश्यकता छ भने संविधानसम्मत रुपमै परिवर्तन गर्नुपर्ने नेता सिटाैलाले बताउनुभयाे ।
काेशी सरकार तरबारकाे धारमा रहेकाे भन्दै उहाँले प्रदेश सभाले तीव्र गतिमा कानुन बनाउन नसकेको लगायत कैयाैं समस्या रहेका बताउनुभयाे ।
