काठमाडौं । प्रतिनिधि सभा सदस्य प्रेम सुवालले बैँकिङ क्षेत्रमा विदेशी लगानी गर्न दिनु नहुने बताउनुभएको छ ।
आइतबार प्रतिनिधि सभा बैठकमा बोल्दै सुवालले बैँकमा विदेशी लगानी हुँदा नाफा जति विदेश जाने र नेपाली ऋणको मारमा पर्ने बताउनुभयो । बैँकिङ क्षेत्रलाई पूर्ण रूपमा सरकारको स्वामित्वमा ल्याउनु पर्नेमा उहाँले जोड दिनुभयो ।
सुवालले बैंकिङ क्षेत्रमा नेपालीकै लगानी हुनु पर्ने बताउनुभयो । ‘विदेशीको लगानीले नाफा जति विदेश जाने, नेपाली गरिब हुने, यो त प्रधानमन्त्रीज्यूहरू धेरै पटक हुनु भएको छ, उहाँहरूलाई अनुभव भएकै कुरा हो नि’, उहाँले भन्नुभयो ।
नेपालीले विदेशमा सम्पत्ति राख्न नपाइने व्यवस्था मिलाउनु पर्ने उहाँले बताउनुभयो । अहिले पनि नेपालीको विदेशमा सम्पत्ति भएको कुरा सार्वजनिक भएको प्रति सुवालले सरकारको ध्यानाकर्षण गराउनुभयो ।
नेपालीलाई योग्यता अनुसारको काम र काम अनुसारको ज्याला व्यवस्था गर्नुपर्ने उहाँले बताउनुभयो । त्यतातिर सरकारको ध्यान जानु पर्ने उहाँको भनाइ छ । जनसङ्ख्याको सन्तुलन मिलाउन सन्तुलित विकास आवश्यक रहेको उहाँले बताउनुभयो । ‘बैँक छ जिल्ला जिल्लामा, मान्छे छैन, सबै बसाइसराइ छ सहरतिर, विदेश तिर’, सुवालले भन्नुभयो ।
सुवालले नेपालमा सकारी बिदा धेरै भएकोले तत्कालको लागि एकचौथाई बिदा कटौती गर्न सुझाव दिनुभयो । विश्वका अन्य देशका बिदासँग नेपालको बिदा तुलना गरेर हेर्न उहाँले सुझाव दिनुभयो ।
शासक, प्रधानमन्त्री र मन्त्रीले स्वयंसेवी भावका साथ काम गर्नुपर्नेमा उहाँले जोड दिनुभयो । शासक प्रशासकहरूका विदेशका विभिन्न बैँकमा भएका पैसा तत्काल फिर्ता ल्याउनु पर्ने उहाँको भनाइ छ । ‘प्रधानमन्त्री मन्त्री भएकाहरूको विदेशी बैँकमा पैसा राखेर नेपालमा पैसा हुन्छ ? नेपालका बैँक त खोक्रो हुन्छ नि’, उहाँले भन्नुभयो ।
सांसद् र मन्त्रीहरूको सहरमा भएको बसाइसराइलाई तुरुन्त आफ्नै जिल्लामा फर्काउनु पर्ने र त्यहाँ विकासका काम अघि बढाउनु पर्ने उहाँको सुझाव छ । नेपालमा नै उत्पादन वृद्धि गरी देशलाई आत्मनिर्भर बनाउनु पर्नेमा उहाँले जोड दिनुभयो । ‘दाल, चामल तरकारी भारतले नपठाए ढुङ्गा खाएर बस्ने, माटो खाएर बस्ने नेपाली ? सरकारको खोइ ध्यान ?’, उहाँले प्रश्न गर्नुभयो ।
ठगी गर्ने सहकारी र फाइनान्सका सञ्चालकको सम्पत्ति लिलामी गरी बचतकर्ताको रकम फिर्ता गर्नुपर्ने उहाँले बताउनुभयो ।
देशका नेताहरूको भेटघाट सांस्कृतिक कार्यक्रममा मात्र नभएर देशका विभिन्न सवालमा बारम्बार हुनु पर्ने उहाँको सुझाव छ ।
भारतका प्रधानमन्त्री नरेन्द्र मोदीले नेपालको भूमि कुञ्जीमा प्रवेश गर्दा पनि नेपाल सरकारले कुनै प्रतिक्रिया नजनाएको प्रति उहाँले आलोचना गर्नुभयो । सरकारको यो व्यवहारले प्रधानमन्त्री प्रचण्डले गुञ्जी माथि नेपालको दाबी छाडेको देखिएको उहाँको भनाइ छ ।माथि नेपालको दाबी छाडेको देखिएको उहाँको भनाइ छ ।
