काठमाडौं । प्रतिनिधि सभा सदस्य रमेश लेखकले संघीय लोकतान्त्रिक प्रणालीको प्रभाकारिताका लागि संसद्को प्रभावकारिता आवश्यकता रहेको बताउनुभयो ।
बिहीबार प्रतिनिधि सभा बैठकमा बोल्दै लेखकले संसद्को प्रभाकारिता सरकारको प्रभावकारितासँग पनि जोडिने बताउनुभयो । संसद् कमजोर भयो, संसद् निस्तेज भयो व्यवस्थाको प्रभाकारिता पनि कमजोर हुने लेखकले बताउनुभयो । सदन मार्फत सरकारलाई जनता प्रति उत्तरदायी बनाउने जिम्मा पनि संसद्कै हुने उहाँको टिप्पणी छ ।
नेपाली कांग्रेस हमेसा प्रभावकारी संसद्को पक्षमा रहेको उहाँले बताउनुभयो । लोकतन्त्रको संरक्षणको निमित्त संसद्ले प्रभावकारी भूमिका निर्वाह गर्नुपर्छ भन्ने पक्षमा कांग्रेस रहेको उहाँले प्रष्ट पार्नुभयो ।
नेपाली कांग्रेस सदैव संवाद, सहमति र सहकार्यको माध्यमबाट अघि बढ्नुपर्छ भन्ने पक्षमा रहेको उहाँले दाबी गर्नुभयो । नेपाली कांग्रेस विगतदेखि सोही बाटोमा अघि बढेको लेखकले बताउनुभयो । ‘लोकतन्त्रमा संवाद सहमति र सहकार्यको संस्कृतिले अघि बढ्यौँ भने मुलुकमा विद्यमान धेरै चुनौतीको सहज रूपले सामना गर्न सक्छौँ’, लेखकले भन्नुभयो ।
सबै विषयमा सहमति र सहकार्य हुन नसके पनि मुलुकका मूलभूत विषयमा सहकार्य र सहमति हुन सक्ने र हुनु पर्ने उहाँको भनाइ छ । त्यसैले मुलुकका मूलभूत विषयमा सहमति र सहकार्यका साथ अघि बढ्न उहाँले सबै राजनीतिक दललाई आह्वान गर्नुभयो ।
नेपालको अहिलेको संविधान असफल भयो भने मूलक एउटा अनिष्टकारी परिस्थितिमा पुग्ने तर्फ उहाँले सचेत गराइनुभयो । ७० वर्ष लामो राजनीतिक यात्राबाट अहिलेको संविधान प्राप्त भएकोले यसलाई सफल बनाउन सबै लाग्नु पर्नेमा उहाँले जोड दिनुभयो ।
अहिलेको संविधान र व्यवस्था विरुद्ध यदाकदा आवाज उठ्ने गरेको र ती प्रायोजित ढङ्गले उठाइने गरेको लेखकले बताउनुभयो । यो व्यवस्था, संविधान र पुराना दल ठिक छैनन् भन्ने भाष्य प्रायोजित रूपमा निर्माण गर्ने प्रयास गरिएको भन्दै त्यसका विरुद्ध सबै दल एक ठाउँमा उभिनु पर्नेमा लेखकले जोड दिनुभयो ।
