काठमाडाैं । राष्ट्रिय सभाका अध्यक्ष गणेशप्रसाद तिमिल्सिना र चिनियाँ कम्युनिष्ट पार्टी (सीपीसी) का तिब्बत स्वायत्त क्षेत्रका सचिव वाङ छुङछेङबीच भेटवार्ता भएकाे छ ।
उहाँहरुबीच सिंहदरबारस्थित अध्यक्ष अध्यक्ष तिमिल्सिनाकाे कार्यकक्षमा बिहीबार भेटवार्ता भएकाे हाे । अध्यक्ष तिमिल्सिनासँग शिष्टाचार भेटका लागि वाङ नेतृत्वकाे चिनियाँ प्रतिनिधिमण्डल सिंहदरबार पुगेकाे थियाे ।
भेटमा दुई देशबीचकाे आपसी सम्बन्ध, सहकार्य र हित लगायत विषयमा कुराकानी भएकाे अध्यक्ष तिमिल्सिनाकाे सचिवालयले जनाएकाे छ ।
अध्यक्ष तिमिल्सिनाले भेटमा नेपाल र चीन घनिष्ठ तथा सौहाद्रपूर्ण सम्बन्ध रहेका देश रहेको बताउनुभयाे । उहाँले चीनसँगको सौहाद्रपूर्ण सम्बन्धलाई नेपालले उच्च महत्व दिएक बताउनुभयो ।
अध्यक्ष तिमिल्सिनाले नेपाल एक चीन सिद्धान्तप्रति आफ्नो प्रतिबद्धतामा अडिग रहेको बताउनुभयो । 'हाम्रो प्रतिबद्धता बलियो, स्पष्ट, सीधा र अटल छ, यस प्रतिबद्धताले समयको परीक्षाको सामना गरिसकेको छ, एक चीन नीतिमा नेपालको आधारभूत अडानलाई आन्तरिक र बाह्य परिस्थितिको बदलावले प्रभाव पार्दैन, हाम्रो भूमिमा चीनको हित विरुद्ध कुनै पनि गतिविधि हुन नदिने हाम्रो प्रतिबद्धता फेरी पनि दोहोर्याउन चाहन्छौं'- उहाँले भन्नुभयाे ।
यसै वर्ष जुनमा चीनको औपचारिक भ्रमणको क्रममा राष्ट्रिय जनकंग्रेसको स्थायी समितिका अध्यक्ष झाओ लेजी र चिनियाँ राजनैतिक परामर्श दातृ सम्मेलनका अध्यक्ष वाङ हु निङसँग भएको भेटको पनि अध्यक्ष तिमिल्सिनाले स्मरण गर्नुभयो । उहाँसँग सचिव वाङले पनि शिष्टाचार भेट गर्नुभएको थियो ।
आफ्नो भ्रमणका क्रममा सीमा नाका सञ्चालन गर्न र नेपालमा उत्पादित घाँस तिब्बत निकासीका लागि गरिएको आग्रह तत्काल कार्यान्वयन भएकोमा धन्यवाद दिँदै उहाँले सुन्तला जातका फलफूलको निकासी गर्ने वातावरण बनाउन तथा चीनको सहयोगमा बनेको पोखरा विमानस्थलमा तिब्बतको राजधानी ल्हासा र सांघाईबाट सिधा उडान गर्न आग्रह पनि गर्नुभयो । यसले पर्यटन र व्यवसाय प्रर्बद्धनमा सहयोग पुग्ने अध्यक्ष तिमिल्सिनाले बताउनुभयाे । नेपालमा जलविद्युत, कृषि उत्पादन, फर्निचर उत्पादन लगायतका उद्योगमा लगानी गर्न चिनियाँ व्यवसायीहरु इच्छुक देखिएकाले त्यसका लागि वातावरण बनाउन दुबै देशले पहल गर्ने विश्वास समेत उहाँले व्यक्त गर्नुभयो ।
अध्यक्ष तिमिल्सिनाले हालै जाजरकोट र रुकुम पश्चिममा गएको विनाशकारी भूकम्पबाट प्रभावितका लागि चीनले पुर्याएको सहयोगका लागि धन्यवाद समेत दिनुभयो ।
साे अवसरमा सीपीसीका तिब्बत सचिव जुनझेङले नेपाल र चीनबीचमा रहेको मित्रतापूर्ण सम्बन्ध र सहकार्यको चर्चा गर्दै जाजरकोट भूकम्पपछि पूननिर्माणको काममा चीनले सहयोग पुर्याउने प्रतिबद्धता जनाउनुभयो । नेपालमा भूकम्प जाँदा त्यसै भौगोलिक अवस्थिति भएको तिब्बत पनि प्रभावित हुने भन्दै उहाँले नेपालको भूकम्पको कम्पनले तिब्बतीको मन पनि दुख्ने र उस्तै पिडाको महशुस हुने बताउनुभयाे । सचिव जुनझेङले तिब्बत सरकारले पनि पुर्ननिर्माण र राहतमा सहयोग पुर्याउने प्रतिबद्धता जनाउनुभयो ।
ल्हासा अन्तर्राष्ट्रिय विमानस्थल निर्माणको काम सकिएकाले छिट्टै ल्हासा काठमाडाैं उडान सञ्चालन हुने पनि उहाँले जानकारी दिनुभयो ।
