काठमाडाैं । सभामुख देवराज घिमिरेले संघीय संसद्को भूमिकालाई प्रभावकारी बनाउनुपर्ने बताउनुभएकाे छ ।
१७औं संघीय संसद् सेवा दिवसका अवसरमा बिहीबार सिंहदरबारमा आयोजित कार्यक्रमलाई सम्बाेधन गर्दै सभामुख घिमिरेले संसद्काे गरिमा बढाउन संसद् सचिवालयले प्रभावकारी भूमिका निर्वाह गर्नुपर्ने बताउनुभयाे ।
विगतको समीक्षासहित आगामी दिनमा संसद्लाई अझ प्रभावकारी बनाउन सराेकारवाला सबैलाई आग्रह गर्नुभयाे । उहाँले शक्ति पृथकीकरणका साथै विश्वव्यापी रुपमा संसद्को भूमिकालाई प्रभावकारी बनाउने विषयमा विगतदेखि अहिलेसम्म आइपुग्दा बिडम्वनापूर्व व्याख्या र विश्लेषण गर्नुपर्ने कुरालाई आफूले गम्भीर रुपमा लिएको बताउनुभयो ।
संसद् सचिवालयलाई प्रभावकारी बनाउनका लागि आफूले पनि प्रभावकारी भूमिका निर्वाह गर्ने प्रतिबद्धता सभामुख घिमिरेले जनाउनुभयाे । संसद् सेवाको विशिष्ट कार्य प्रणालीले विधायिकी कार्य र संसदीय कामकारबाहीमा अविच्छिन्न सहयोग पुगेको उहाँले बताउनुभयाे । स्थायी सरकारको रुपमा रहेका कर्मचारी वर्गको वृत्ति विकास, विशेषज्ञता र मितव्ययी आचरण आजको दिनमा अपेक्षित रहेको पनि सभामुख घिमिरेले बताउनुभयाे ।
