काठमाडौं । प्रतिनिधि सभा सदस्य राजेन्द्र राईले बालकुमारीमा दुई युवा मारिएको घटनामा गृह मन्त्री नारायणकाजी श्रेष्ठले राजीनामा दिनु पर्ने माग गर्नुभएको छ ।
सोमबार राज्य व्यवस्था समिति बैठकमा बोल्दै राईले तलका प्रहरी वा अन्य कर्मचारीलाई निलम्बन गरेर सरकार उम्किन नमिल्ने बताउनुभयो । सो घटनामा सबैभन्दा पहिला गृह मन्त्रीले राजीनामा दिनु पर्ने उहाँको माग छ । ‘तपाईँ शालीन व्यक्ति, तपाईँ राजीनामा दिनुस्, राजीनामा दिनु पर्यो नि, विदेश गएर काम गरेर खान्छु भन्ने युवालाई तपाईँ ताकि ताकि गोली हानेर मार्नु हुन्छ भने तपाईँले राजीनामा नदिएर कसले राजीनामा दिन्छ ?’, राईले प्रश्न गर्नुभयो ।
उहाँले घटनाको तोडमोड गरेर आफ्नो अनुकूल कुरा नराख्न सुरक्षा अधिकारीलाई पनि आग्रह गर्नुभयो । ठाउँको ठाउँ गोली हानेर मान्छे मारेको विषयलाई तोडमोड नगर्न उहाँले सुरक्षा प्रमुखहरूलाई आग्रह गर्नुभयो ।
राईले गृह मन्त्रीले आफ्नो जिम्मेवारी पूरा गर्न नसकेको बताउनुभयो । सबै तिर अशान्ति र देशव्यापी अराजकताको स्थिति भएको उहाँले बताउनुभयो । सरकारले सुशासन दिन नसकेको उहाँको भनाइ छ । छानबिन आयोगको कामलाई प्रभाकारी बनाउन पनि गृह मन्त्रीले राजीनामा दिनु पर्ने उहाँको माग छ । ‘यसरी मान्छे मार्न पाइँदैन, तपाईँले तत्काल राजीनामा दिनु पर्छ’, उहाँले भन्नुभयो ।
प्रहरीले साधन श्रोत छैन भने मानिस मार्न नमिल्ने बताउनुभयो । ‘साधन श्रोत छैन भनेर मान्छे मार्न मिल्छ ?’, उहाँको प्रश्न थियो ।
उहाँको छानबिनको दायरमा मन्त्रीको पीएओलाई होइन मन्त्रीलाई ल्याउनु पर्ने बताउनुभयो । मन्त्रीले भनेपछि पीएसओले काट्न नसक्ने भएकोले उसलाई निलम्बन गर्नुको कुनै अर्थ नभएको राईले बताउनुभयो । ‘तपाईँ एउटा पीएसओलाई कारबाही गर्ने, एउटा डीएसपीलाई, सीडीओलाई कारबाही गर्ने ?, सचिवलाई गर्नु न तपाईँ कारबाही, आईजीपीलाई गर्नु न तपाईँ कारबाही, तलको मानिसलाई जहिले पनि कारबाही गर्न मिल्छ ? तपाईँले सोच्नुस् पहिला माथिको मान्छेलाई कारबाही गर्नुस्, अनि बल्ल तलकालाई गर्नुस्, माथिकाले डङ्ग नपुर्याउने अनि तलकालाई कारबाही गर्ने ?’, राईले भन्नुभयो ।
