काठमाडौं । प्रतिनिधि सभा सदस्य रघुजी पन्तले नैतिकता भनेको व्यक्तिले आफैले अनुभूत गर्ने कुरा भएको बताउनुभएको छ ।
बालकुमारी घटनाको बारेमा सोमबार प्रतिनिधि सभाको राज्य व्यवस्था समिति बैठकमा बोल्दै पन्तले यदि त्यो अनुभूत गर्ने हो भने गृह मन्त्रीले आफ्नो पदबाट राजीनामा दिनु पर्ने बताउनुभयो । गृह मन्त्रीको राजीनामाको प्रश्न उठेकाले त्यसमा उहाँले आफैँले विचार गर्नुपर्ने पन्तको भनाइ छ ।
बालकुमारी घटना हेर्दा प्रहरी फोर्स प्रहरी प्रमुख र गृह मन्त्रीको नियन्त्रणमा नरहेको देखिएको उहाँले बताउनुभयो । प्रहरी फोर्स बनाएपछि अभाव मात्र देखाएर नहुने बताउँदै पन्तले उनीहरूलाई आवश्यक श्रोत र सामाग्री दिनु पर्ने उहाँको तर्क छ ।
श्रम मन्त्रीको गलत कार्यशैलीको कारणले शुक्रबार बालकोमा दुई युवा मारिएका उहाँको भनाइ छ । श्रम तथा रोजगार मन्त्री शरतसिंह भण्डारीले वैदेशिक रोजगारीमा जाने कामदारको अभिमुखीकरण तालिमको प्रमाणपत्र शुल्क ७ सय रुपैँयाबाट बढाएर २ हजार ८ सय पुर्याउँदा एजेन्सीबाट करोडौँ पैसा उठाएको उहाँले दाबी गर्नुभयो ।
उहाँले भ्रष्टाचारी मन्त्रीलाई क्याबिनेटमा राखेर सामान्य कर्मचारीको करिअर सिद्ध्याउन निलम्बन गर्ने र जिम्मेवारी खोस्ने काम नगर्न उहाँले चेतावनी दिनुभयो । उहाँले बालकुमारी गोली काण्डमा सीडीओ र एसपीको जिम्मेवारी खोस्ने र पीएसओसहित सामान्य प्रहरी कर्मचारीलाई निलम्बन गरेर आफ्नो कमजोरी ढाकछोप नगर्न सरकारलाई आग्रह गर्नुभयो । ‘भ्रष्टाचारीलाई क्याबिनेटमा राख्ने, प्रधानमन्त्रीले सुशासनको भाषण गर्दै हिँड्ने, तपाईँ सुशासनको भाषण गर्दै हिँड्ने, तपाईँको भाषण जनताले कसरी पत्याउने ?’, उहाँले भन्नुभयो ।
श्रम मन्त्री भण्डारी बालकुमारी घटनाको पूर्ण जिम्मेवार रहेको उहाँले बताउनुभयो । उहाँकै गलत गतिविधिका युवाहरू आक्रोशित बनेर आन्दोलनको अवस्था आएको उहाँको भनाइ छ ।
उहाँले स्वास्थ्य मन्त्री मोहन बस्नेतले समेत वीर अस्पतालका सयौँ कर्मचारी एकै पटक हटाएर आफ्ना मान्छे राख्ने काम गरेको बताउनुभयो । एक्स-रे मेसिन खरिद प्रकरणमा अख्तियारमा मुद्दा परेको अवस्थामा स्वास्थ्य मन्त्रीले राजीनामा दिनु पर्ने उहाँले माग गर्नुभयो । सो प्रकरणमा स्वास्थ्य मन्त्रीले करोडौँ रुपैँया भ्रष्टाचार गरेको उहाँले बताउनुभयो ।
शुक्रबार इपीएस मार्फत कोरिया जाने परीक्षामा सहभागी हुन पाउनुपर्ने माग राख्दै शुक्रबार विद्यार्थीले गरेको आन्दोलनमा प्रहरीले गोली चलाउँदा दुई युवाको ज्यान गएको थियो । विद्यार्थीको आन्दोलन भइरहेको ठाउँमा पुगेर मन्त्री ज्वालाले स्थिति भड्काए पछि युवा आक्रोशित हुँदा भिड नियन्त्रणको लागि भन्दै प्रहरीले गोली चलाएको थियो । प्रहरीले गोली चलाएर युवाको ज्यान लिएपछि युवाहरूले मन्त्री ज्वाला चढेको गाडी पनि जलाइदिएका थिए ।
