काठमाडाैं । प्रतिनिधि सभा सदस्य रघुजी पन्तले भारतीय दूतावास मार्फत नेपालमा क्रमशः भारतीय हस्तक्षेप बढेको भन्दै आपत्ति जनाउनु भएको छ ।
शुक्रबार प्रतिनिधि सभाको राज्य व्यवस्था तथा सुशासन समिति बैठकमा बोल्दै पन्तले भारतीय दूतावासले यस अघि नेपालमा सिधै खर्च गर्दै आएको ५ करोड रुपैँयालाई बढाएर २० करोड रुपैँया पुर्याउने सम्झौता हुनु नेपालको सार्वभौमसत्ता माथिको हस्तक्षेप भएको बताउनुभयो । ‘उक्त २० करोड रुपैँया सिधै भारतीय दूतावासले खर्च गर्न पाउने कार्यले नेपाल राष्ट्रको स्वतन्त्रलाई, आर्थिक सम्पन्नतालाई कमजोर बनाउनु छ, यसले अनावश्यक र अवाञ्छित राजनीतिक प्रभाव, दबाब र हस्तक्षेपलाई निम्त्याउँछ र आन्तरिक मामलामा बाह्य हस्तक्षेपलाई प्रवेश गर्ने मौका दिन्छ, त्यसैले यो कार्य नेपालको आर्थिक सम्प्रभुता, स्वतन्त्र निर्णय गर्ने अधिकारलाई वञ्चितमा पारेर गरिएको सम्झौता हुनु पर्छ’, पन्तले भन्नुभयो ।
पन्तले उक्त सम्झौता राष्ट्र हित विपरीत भएको बताउनुभयो । त्यसले सो सम्झौतामा विचार गर्न उहाँले प्रधानमन्त्रीलाई आग्रह गर्नुभयो ।
पन्तले नेपाल एक सार्वभौमसत्ता सम्पन्न मुलुक भएकोले नेपालमा एकै पटक चार पाँचवटा मुलुकका प्रतिनिधि पनि आउन सक्ने उहाँले बताउनुभयो । तर भारतीय विदेश मन्त्री आएको दिन चीनका अधिकारी नेपाल आएको विषयमा भारतीय विदेश मन्त्रीले अप्रसन्नता व्यक्त गरेको भन्ने सुनिएको बताउँदै पन्तले यदि त्यसो गरिएको हो भने त्यो कूटनीतिक मर्यादा र नेपालको सार्वभौमसत्ता विपरीतको काम भएको उहाँले प्रष्ट पार्नुभयो ।
