काठमाडाैं । प्रतिनिधि सभाको कानुन, न्याय तथा मानव अधिकार समितिले भारतसँग भएको सम्झौताबारे प्रधानमन्त्री पुष्पकमल दाहाल प्रचण्डसँग जानकारी लिने निर्णय गरेको छ ।
शुक्रबार सिंहदरबारमा बसेको समितिकाे बैठकले भारतीय विदेशमन्त्री एस जयशंकरको नेपाल भ्रमणका क्रममा भएको सहमति र सम्झौताका बिषयमा जानकारी लिन प्रधानमन्त्रीलाई समितिमा बोलाउने निर्णय गरेको हो ।
बैठकमा समितिका केही सदस्यहरुले नेपाल र भारतबीच भएका केही सम्झौता मुलुकको हित विपरीत हुनसक्ने भएकाले सरकारसँग जानकारी माग्नुपर्ने बताएका थिए ।
सांसद्हरुको मागपछि समिति सभापति बिमला सुवेदीले सम्झौताका विषय समितिको पनि क्षेत्राधिकार भएकाले यस विषयमा प्रधानमन्त्रीलाई समितिमा बोलाएर जानकारी लिने निर्णय गरेको बताउनुभयो ।
बैठकमा समिति सदस्य महेश बर्तौलाले नेपाल र भारतकाबीच भएको सम्झौतामाथि विभिन्न कोणबाट टिकाटिप्पणी भइरहेको बताउनुभयो । उहाँले समानान्तर सरकारको अभ्यास गर्ने गरी भारतलाई अधिकार दिएको भन्ने कुरा पनि आएकाले सम्झौताबारे प्रधानमन्त्रीले समितिमा जानकारी गराउनुपर्ने माग गर्नुभयो ।
समिति सदस्य सन्तोष परियारले अन्तर्राष्ट्रिय सहमति सम्झौता समितिको कार्यक्षेत्रभित्र पर्ने भएकाले भारतसँग भएका सहमतिबारे जानकारी लिनुपर्ने बताउनुभयो । सरकारले राज्यलाई लामो समयसम्म असर पर्ने कुनै पनि सन्धी-सम्झौता गर्न नहुने उहाँले बताउनुभयाे ।
अन्य समिति सदस्यहरुले पनि भारतसँग भएको सहमतिबारे सरकारले समितिमा आएर प्रष्ट पार्नुपर्ने बताएका थिए ।
