काठमाडौं । प्रतिनिधि सभामा प्रमख प्रतिपक्षी दलका सचेत महेश बर्तौलाले सरकारले गरेका सम्झौता पढ्न पाउन सांसद्हरुको अधिकार भएको बताउनुभएको छ ।
बुधबार प्रतिनिधि सभा कानुन समितिको बैठकमा बोल्दै बर्तौलाले प्रधानमन्त्रीले भारत भ्रमणको बेला गर्नुभएको सम्झौता समेत अहिलेसम्म सांसदले हेर्न नपाएको बताउनुभयो । संसद् र संसद्का समितिमा बारम्बार रुलिङ गर्दा समेत ती सम्झौताको प्रति संसद्लाई उपलब्ध नभएका भन्दै बर्तौलाले आलोचना गर्नुभयो ।
भारतीय दूतावासबाट सोझै २० करोडसम्म सञ्चालन गर्ने सम्झौता राष्ट्रघाती भएको उहाँले टिप्पणी गर्नुभयो । सो सम्झौता विगतकै निरन्तरता भएको भनि प्रधानमन्त्रीले गर्नुभएको टिप्पणी प्रति बर्तौललो विगतमा कमजोरी भएको भए पनि सच्याउनु पर्नेमा विगतको कमजोरीलाई टेकेर झन् ठुलो कमजोरी गर्ने काम भएको बताउनभयो । ‘कमजोरीलाई सिरानी हालेर अर्को कमजोरी गर्न मिल्छ’, उहाँले प्रश्न गर्नुभयो ।
नेपाल सरकारले समेत संसद्का अनुमति बिना आफ्नो देश भित्र बजेट खर्च गर्न नपाउने कानुनी व्यवस्था रहेको बताउँदै बर्तौलाले अन्य मुलुकले आफूखुसी बजेट खर्च गर्ने कुरा नेपालको बजेटरी सिस्टम भित्रको काम नभएको स्पष्ट पार्नुभयो । ‘नेपालको बजेटरी सिस्टम भन्दा बाहिरबाट आउने कुनै पनि कुरा राष्ट्रघात हो’, उहाँले भन्नुभयो ।
सरकारले गरेको सम्झौता जानकारी गराउन भनेर खबरदारी गरेपछि मात्र जानकारी गराउने कुरा उल्टो बाटो भएको उहाँले बताउनुभयो । त्यसैले कुनै पनि सम्झौता गर्नु अघि संसद् र समितिहरूमा छलफल हुने पर्नेमा उहाँले जोड दिनुभयो ।
