सदनलाई सत्ता टिकाउने र सरकार जोगाउने काममा प्रयोग गर्नु हुँदैन: रवि लामिछाने

काठमाडौं । राष्ट्रिय स्वतन्त्र पार्टीका सभापति रवि लामिछानेले जनताप्रति उत्तरदायी भएर कानुन बनाउन आफ्नो पार्टी पूर्ण तयारीका साथ यसपालीको सदनमा आएको बताउनुभएकाे छ ।

प्रतिनिधि सभाको सोमबारको बैठकपश्चात उनले सञ्चारकर्मीसँग यस्तो बताउनु भएकाे हाे । विधेयकहरुमा सरकारले ध्यान दिएन भने जिम्मेवार दलका तर्फबाट गर्नुपर्ने कामको तयारीका साथ आएको उहाँले बताउनुभयाे ।

उहाँ भन्नुभयाे, ‘ध्यान दिनुपर्ने विधेयकहरुमा सरकारले ध्यान दिएन भने प्राइभेट बिल समेत ल्याएर गर्नुपर्ने सम्पूर्ण कार्यहरुका लागि हामी काम गरिरहेका छौ । यसपटकको सदनलाई प्रभावकारी बनाउनको लागि जिम्मेवार राजनीतिक दलका तर्फबाट हामीले गर्नुपर्ने कामको तयारीका साथ आएका छौं ।’

उहाँले जनताप्रति उत्तरदायी सदन भएको भन्दै यसलाई सत्ता टिकाउने र सरकारलाई जोगाउने जस्तो कामका लागि प्रयोग गर्न नहुने बताउनुभयाे ।

उहाँले भन्नुभयाे, ‘सरकारले अघिल्लो अधिवेशनमा जस्ता बिजनेस नदिने काम नगरोस्, जनताप्रति उत्तरदायी सदन भएको हुनाले जनतासँग मात्र सम्बन्धित रहोस् । यसलाई सत्ता टिकाउने, सरकारलाई जोगाउने जस्तो कामका लागि लागि होइन ।’