काठमाडौं । नेकपा माओवादी केन्द्रका राष्ट्रिय सभा सदस्य जगप्रसाद शर्माले भूकम्प प्रभावित जाजरकोट, रुकुम पश्चिम, बझाङ र बाजुरामा पुनर्निर्माण व्यवस्थित तरिकाले अगाडि बनाउन सरकारको ध्यानाकर्षण गराउनुभएकाे छ ।
साेमबार बसेकाे राष्ट्रिय सभा बैठकमा बाेल्दै सांसद् शर्माले पीडितलाई राहत दिन र विशेष योजनासाथ स्थायी आवास निर्माणमा लाग्न माग्नुभयाे ।
उहाँले अहिलेको व्यवस्थामाथि प्रश्न उठाउनेका सम्बन्धमा राज्यले गम्भीर भएर सोच्नुपर्ने बताउनुभयाे । व्यवस्थाको औचित्यमाथि प्रश्न उठिरहेको भन्दै सांसद् शर्माले जनवर्गीय हिसाबले अहिलेको व्यवस्था उत्तम रहेको बताउनुभयाे । 'यो व्यवस्था लामो संघर्षकाे प्रक्रिया पार गरेर आएको हो, पछिल्लो समय व्यवस्थामाथि उठेका प्रश्न लोकतन्त्रको सुन्दर पक्ष पनि हो, तर संविधान र व्यवस्थामा आँच आउनेगरि जसरी प्रश्न उठिरहेका छन्, यो गम्भीर संकेत हो, समग्रमा जुन व्यवस्था हामीले ल्याएका छौं, निकै सुन्दर छ'- सांसद् शर्माले भन्नुभयाे ।
जनताको संघर्षबाट प्राप्त संघीय लोकतान्त्रिक गणतन्त्रात्मक व्यवस्थालाई सुदृढ बनाउन दलहरु एकताबद्ध हुनुपर्ने उहाँले बताउनुभयो । राष्ट्रियसभाको औचित्य र सार्थकतालाई नयाँ ढंगले पूरा गर्नुपर्ने बताउनुभयो ।
