काठमाडाैं । महिला, बालबालिका तथा ज्येष्ठ नागरिक मन्त्री सुरेन्द्र राज आचार्यले अपांगता भएका व्यक्तिको अधिकार कार्यान्वयनका लागि सबैबीच सहकार्य हुनुपर्ने बताउनुभएकाे छ ।
शुक्रबार सिंहदरबारमा बसेको राष्ट्रिय सभाको दिगो विकास तथा सुशासन समिति बैठकमा मन्त्री आचार्यले अपांगतामैत्री वातावरण बनाउन र अधिकार स्थापित गर्न सरोकारवाला मन्त्रालय लगायत सबैबीच सहकार्य हुनुपर्ने बताउनुभयाे ।
उहाँले बजेट अभावका कारण पनि विभिन्न कार्यक्रम कार्यान्वयनमा समस्या भएको बताउनुभयो । मन्त्री आचार्यले अपांगता परिचयपत्र डिजिटल प्रविधिमार्फत वितरण गर्नुपर्ने बताउनुभयाे । सहायक सामाग्री वितरण कार्यक्रमहरुलाई तीनै तहका सरकारबीच समन्वयनका आधारमा अघि बढाउनुपर्ने उहाँले बताउनुभयो ।
अपांगता भएका व्यक्तिहरुको अधिकार कार्यान्वयन सम्बन्धी विषयमा राष्ट्रिय सभाबाट स्वीकृत भएको संकल्प प्रस्ताव कार्यान्वयनमा मन्त्रालयले विशेष ध्यान दिने मन्त्री आचार्यले बताउनुभयो ।
बैठकमा समिति सदस्यहरुले अपांगता भएका लागि प्रभावकारी नीति बनाउनुपर्ने, राज्यका तर्फबाट आवश्यक सामाग्रीहरुको वितरण हुनुपर्ने लगायत सुझाव दिएका थिए ।
