काठमाडौं । प्रतिनिधि सभाको बैठक आज बस्दैछ ।
संघीय संसद् भवन नयाँ बानेश्वरमा बिहान ११ बजे बस्ने प्रतिनिधि सभा बैठकका लागि विभिन्न ७ वटा सम्भावित कार्यसूची ताेकिएकाे छ ।
बैठकमा सभामुख देवराज घिमिरेले प्रधानमन्त्री तथा मन्त्रिपरिषद्को कार्यालयबाट प्राप्त कार्यभारसम्बन्धी पत्र पढेर सुनाउनुहुने सम्भावित कार्यसूची रहेकाे संसद् सचिवालयले जनाएकाे छ ।
त्यसपछि प्रधानमन्त्री प्रचण्डसँगको प्रश्नोत्तर कार्यक्रम सुरु हुनेछ । संसद् सचिवालयका अनुसार प्रधानमन्त्रीसँगको प्रत्यक्ष प्रश्नोत्तरका लागि १३ सांसदले लिखित प्रश्न पेस गरेका छन् ।
बैठकमा राष्ट्रिय सभामा उत्पत्ति भएको 'शहीद दशरथ चन्द स्वास्थ्य विज्ञान विश्वविद्यालय विधेयक, २०८०' का सम्बन्धमा राष्ट्रिय सभाबाट प्राप्त सन्देशसहितको विधेयक टेबुल गरिने सम्भावित कार्यसूची रहेकाे संसद् सचिवालयले जनाएकाे छ ।
बैठकमा राज्य व्यवस्था तथा सुशासन समितिका सभापति रामहरि खतिवाले राष्ट्रिय सभामा उत्पत्ति भएको 'अनुगमन तथा मूल्यांकन विधेयक सम्बन्धी प्रतिवेदन, २०८०' पेस गर्नुहुने कार्यसूची छ ।
सांसद् प्रेम सुवालले 'आर्थिक कार्यविधि तथा वित्तीय उत्तरदायित्व (पहिलो संसोधन) अध्यादेश, २०८० लाई अस्वीकार गरियोस्' भनी राखेको प्रस्तावलाई निर्णयार्थ प्रस्तुत गरिने कार्यसूची पनि छ ।
बैठकमा अर्थमन्त्री प्रकाशशरण महतले 'आर्थिक कार्यविधि तथा वित्तीय उत्तरदायित्व (पहिलो संशाेधन), अध्यादेश २०८० लाई स्वीकृत गरियोस्' भनी प्रस्ताव प्रस्तुत गर्नुहुने कार्यसूची पनि रहेकाे संसद् सचिवालयले जनाएकाे छ ।
अर्थमन्त्री महतले नै 'बैंकिङ कसुर तथा सजाय (दोस्रो संसोधन) विधेयक,२०८० माथि विचार गरियोस्' भनी प्रस्ताव प्रस्तुत गर्नुहुनेछ ।
