काठमाडौं । प्रतिनिधि सभा सदस्य महेश बर्तौलाले बालकुमारीमा प्रहरीले गोली चलाउँदा दुई युवाको ज्यान गएको घटनामा नेपाल सरकारका भौतिक पूर्वाधार तथा यातायात मन्त्री प्रकाश ज्वाला मुख्य दोषी भएको प्रतिवेदन सार्वजनिक हुँदा पनि ती मन्त्रीलाई बर्खास्त नगरेको भन्दै आपत्ति जनाउनुभएको छ ।
आइतबार प्रतिनिधि सभा बैठकमा बोल्दै नेकपा एमाले संसदीय दलका सचेतक समेत रहनुभएका बर्तौलाले दोषी देखिएका मन्त्रीलाई प्रधानमन्त्रीले बर्खास्त नगरेको प्रति एमालेको आपत्ति रहेको बताउनुभयो । सामान्य सिपाहीलाई कारबाहीको डण्डा, मन्त्रीलाई उन्मुक्ति, यो हुन सक्दैन’, उहाँले भन्नुभयो ।
सिपाहीलाई डण्डा, मन्त्रीलाई झण्डा, जनतालाई ऐन मन्त्रीलाई चैन लोकतन्त्रमा स्वीकार्य नभएको उहाँले बताउनुभयो । सो घटनामा संलग्न मन्त्रीलाई बर्खास्त गर्नुपर्ने उहाँले माग राख्नु भयो । उक्त घटनामा गृह मन्त्री समेत जोडिनुभएकोले उहाँलाई पनि बर्खास्त गर्नुपर्ने बर्तौलाले बताउनुभयो ।
अख्तियारको निगरानीमा रहेको व्यक्तिलाई देशको मन्त्री बनाइराखेको भन्दै उहाँले आपत्ति प्रकट गर्नुभयो । भ्रष्टाचारमा डुबेका, अख्तियारमा बयान दिन धाइरहेका मन्त्रीलाई सरकारमा राखेर सुशासनको रटान रट्ने प्रधानमन्त्रीको सुगा रटाई सुन्न आफूहरू तयार नरहेको बर्तौलाले भन्नुभयो ।
पुरातात्विक लुम्बिनी क्षेत्रको उत्खननको काम प्रधानमन्त्रीले घरबेटीको छोराको कम्पनिलाई दिने निर्णय गरेकोमा पनि उहाँले आपत्ति जनाउनुभयो । पैसाको लागि दाम्लो चुँडाउने मन्त्री र प्रधानमन्त्रीको चरित्रले देशको शिर झुकेको उहाँले बताउनुभयो । यस्ता व्यक्तिहरू सरकारमा रहँदा अनुसन्धान प्रक्रिया प्रभावित हुने भएकाले उहाँहरूलाई पदबाट बरखास्त गर्नुपर्ने उहाँले माग गर्नुभयो ।
