काठमाडौं । प्रतिनिधि सभा सदस्य प्रेम सुवालले उसको स्वार्थसँग जोडिएका देशको भ्रमणमा जाँदा उसैको पैसामा जाने कार्य रोक्नु पर्ने बताउनुभएको छ ।
आइतबार प्रतिनिधि सभा बैठकमा बोल्दै सुवालले भारतसँग नेपालको धेरै विषय विवादमा रहेकाले भारतको पैसामा प्रधानमन्त्री र मन्त्रीले भारत भ्रमण गर्नु नहुने सुझाव दिनुभयो । ‘नेपालसँग के प्रधानमन्त्रीको भ्रमणको लागि पैसा छैन ?’, सुवालले प्रश्न गर्नुभयो ।
उहाँले भारतका ३६ करोड जनता गरिब, ६० करोड जनता दिनको एक छाक मात्र खाने, ४८ प्रतिशतको शौचालय नै नभएको, ३० करोड महिला खुल्ला शौचालय जाने देश भएको स्मरण गराउनुभयो । त्यसैले भारतले नेपाललाई गर्ने सहयोग स्वार्थमा आधारित हरेको सुवालले बताउनुभयो । ‘भारतले पहिला आफ्ना देशका जनतालाई हेर्नु जरुरी छ’, उहाँले भन्नुभयो ।
नीतिगत निर्णयको नाममा भ्रष्टाचारमा संलग्नलाई उन्मुक्ति दिनु नहुने सुवालले बताउनुभयो । यसमा प्रधानमन्त्री स्पष्ट हुनुपर्नेमा सुवालले जोड दिनुभयो । सुवालले भारतीय दूतावासले नेपालमा सोझै लगानी गर्न मिल्ने भनिएको २० करोडको बजेट पनि खारेज गर्नुपर्ने माग गर्नुभयो ।
