काठमाडौं । आज प्रतिनिधि सभा र राष्ट्रिय सभा बैठक बस्दै छ । दुवै सदनको बैठक बिहान ११ बजे बस्दै छ ।
राष्ट्रिय सभा बैठकमा दिलकुमारी थापाले ‘मौलिक हक कार्यान्वयनको लागि बन्न बाँकी कानुन २०८१ असोज ३ गतेसम्म निर्माण गरिसक्नु पर्ने सम्बन्धी’ सङ्कल्प प्रस्ताव प्रस्तुत गर्ने कार्यक्रम छ । अर्थमन्त्री प्रकाशशरण महतले ‘सुरक्षित कारोबार (पहिलो संशोधन) विधेयक, २०८०’ लाई पनि सभा समक्ष पेस गर्ने कार्यसूची छ ।
बैठकमा कानुन न्याय तथा संसदीय मामिला मन्त्री धनराज गुरुङले ‘विधायन व्यवस्थापन समितिको प्रतिवेदनसहित विधायन सम्बन्धी विधेयक २०८० माथि छलफल गरियोस् भन्ने प्रस्ताव सदनमा प्रस्तुत गर्ने सम्भावित कार्यसूची छ । आजै सो विधेयक पारित गरियोस् भन्ने प्रस्ताव समेत सभामा पेस हुँदै छ ।
आजको प्रतिनिधि सभा बैठकमा सभामुख देवराज घिमिरेले प्रधानमन्त्री तथा मन्त्रिपरिषद् कार्यालयबाट प्राप्त कार्यभार तोकिएको पत्र पढेर सुनाउने कार्यसूची रहेको छ । त्यस्तै कृषि, सहकारी तथा प्राकृतिक स्रोत समितिकी सभापति आरजु राणाले राष्ट्रिय सभामा उत्पत्ति भएको खाद्य स्वच्छता तथा गुणस्तर विधेयक सम्बन्धी समितिको प्रतिवेदन २०८० पेस गर्ने सम्भावित कार्यसूची रहेको छ ।
यसै गरी अर्थ मन्त्री प्रकाशशरण महतले भन्सार विधेयक २०८० माथि बिचार गरियोस् भन्ने प्रस्ताव प्रस्तुत गर्ने कार्यक्रम रहेको छ । बैङ्किङ कसुर तथा सजाय (दोस्रो संशोधन) विधेयक २०८० लाई दफावार छलफलका लागि बन्धित समितिमा पठाइयोस् भन्ने प्रस्ताव पनि प्रतिनिधि सभा बैठकमा पेस हुँदै छ ।
प्रतिनिधि सभाको बिहीबारको बैठकमा उपप्रधानमन्त्री एवं गृह मन्त्री नारायणकाजी श्रेष्ठले ‘राजनीतिक दल सम्बन्धी (दोस्रो संशोधन) विधेयक २०८०’ प्रस्तुत गर्ने कार्यसूची रहेको थियो । तर, बैठक सञ्चालनका लागि आवश्यक गणपूरक सङ्ख्या नपुगे पछि बैठक आजसम्मका लागि स्थगित भएको हो ।
