काठमाडौं । संसदीय व्यवस्थामा जसको बहुमत हुन्छ, सरकार त्यसैको हुन्छ ।
संसदमा बहुमत हुनेको सरकार हुने भएकोले संसदमा उनीहरूको नै सङ्ख्या बढी हुनु स्वाभाविक हो । तर शुक्रबार प्रतिनिधि सभा बैठकमा सत्तारुढ दल माओवादी केन्द्रका सांसद माधव सापकोटाले संसद्मा सत्ता पक्ष निरीह भएको बताउनुभयो । उहाँले त्यति मात्र भन्नुभएन सत्ता पक्ष कमजोर भएकाले प्रतिपक्षले ढ्यापढ्याप गरेर बोल्न नदिएको आरोप पनि लगाउनुभयो ।
‘तपाईँहरूसँग आज सङ्ख्या बढी, प्रमुख प्रतिपक्षसँग सङ्ख्या बढी छ, हामी त उसै सानो पार्टी, बिचको नेपाली कांग्रेस किन कम भयो थाहा छैन, तपाईँहरूसँग सङ्ख्याको बल छ भन्न बित्तिकै बेस्सरी ढ्यापढ्याप गरेर हाम्रा स्वरहरूलाई कुण्ठित गर्ने ? यही हो लोकतन्त्र ?, यही हो प्रमुख प्रतिपक्षले हामीलाई सिकाउन खोजेको कुरा ?’, सापकोटाको प्रश्न थियो ।
सापकोटाले संसदमा सत्तारुढ दलका सांसदहरू टुलुटुलु हेरेर बस्नु पर्ने निरीहता पनि प्रकट गर्नुभयो । ‘हामी कुन मनोबलका साथ यो संसदमा बहस गर्ने ? हामी कुन मनोबलले जनताका आवाज यो संसद्मा घन्काउने ?’, उहाँले प्रश्न गर्नुभयो ।
उहाँले सभामुखले समेत बैठकमा सत्ता पक्षलाई हेप्ने काम गरेको आरोप लगाउनुभयो । सभामुखले आफ्नो तजबिजमा सत्ता पक्षका सांसदलाई बोल्ने समय नदिएको आरोप सापकोटाको छ । सभामुखले आफूलाई आनन्द आएका कुरा मात्र बोल्न दिएको सापकोटाले आरोप लगाउनुभयो ।
