काठमाडौं । सत्ता पक्षले प्रतिपक्षलाई दोषारोपण गरेपछि विवाद बढेर शुक्रबार मध्यान्हबाट १५ मिनेटको लागि रोकिएको प्रतिनिधि सभा बैठक अझै सुरु हुन सकेको छैन ।
शुक्रबार प्रतिनिधि सभा बैठक सुरु हुने बित्तिकै प्रतिपक्षी दलले सरकारका विवादित मन्त्रीले राजीनामा दिनु पर्ने माग गरेका थिए । बालकुमारी घटनामा दोषी देखिएका मन्त्री प्रकाश ज्वाला, अख्तियारमा बयान दिइरहेका मन्त्री मोहनबहादुर बस्नेत लगायतको विषयमा प्रधानमन्त्रीले जवाफ दिनु पर्नेमा माग प्रतिपक्षी सांसदले राख्नु भएको थियो ।
सोही क्रममा सत्तारुढ दल नेपाली कांग्रेस सांसद राजेन्द्र केसीले प्रतिपक्षले नियतवश गणपूरक सङ्ख्या पुर्याउन नदिन बैठक छोडेको कारण बिहीबार सरकाले प्रतिनिधि सभामा छलफलको लागि पेस गर्न लागेको राजनीतिक दल सम्बन्धी विधेयक पेस हुन नसकेको आरोप लगाउनुभएको थियो । त्यस पछि प्रतिनिधि सभा बैठकमा आरो प्रत्यारोप सुरु भएको थियो ।
उहाँको सो आरोप पछि विपक्षी सांसदले उठेर विरोध जनाएका थिए । सत्तापक्ष र प्रतिपक्षी सांसद प्रतिवादमा उत्रिँदा विवाद बढेपछि सभामुखले १५ मिनेटको लागि बैठक स्थगित गर्नुभएको थियो ।
१५ मिनेटको लागि बैठक स्थगित भए पनि दलहरू बिच छलफल नहुँदा पुनः बैठक बस्न सकेको छैन । बैठक सुचारु गर्ने विषयमा सरकारले चासो देखाएको छैन । प्रतिनिधि सभामा प्रधानमन्त्रीले जवाफ दिनुपर्ने माग उठिरहँदा प्रधानमन्त्री भने पार्टीको अर्को कार्यक्रमलाई सम्बोधन गर्दै हुनुहुन्थ्यो ।
बैठक रोकिए पछि प्रमुख प्रतिपक्षी दलका प्रमुख सचेतक पदम गिरीले सत्ता पक्षकै कारण बैठक रोकिएको बताउनुभयो । सत्ता पक्षको संसद् सञ्चालन गर्ने नियत नदेखिएको उहाँले प्रतिक्रिया दिनुभयो । सत्ता पक्षले आफ्नो गल्ती लुकाउन प्रतिपक्षलाई हिलो छ्याप्ने काम गरेको भन्दै गिरीले आपत्ति जनाउनुभयो ।
