काठमाडौं । नेपाली कांग्रेसका प्रमुख सचेतक रमेश लेखकले सत्तापक्ष र प्रतिपक्ष मिलेर संसद्लाई प्रभावकारी बनाउनुपर्ने बताउनुभएकाे छ ।
शुक्रबार बसेको प्रतिनिधि सभाको दोस्रो बैठकको सुरुमा बोल्दै प्रमुख सचेतक लेखकले संसद् कमजोर भए अहिलेको व्यवस्थामा नै असर पर्ने बताउनुभयाे ।
जनतालाई याे व्यवस्थाले, याे संसद्ले नै देशकाे हित गर्न सक्छ, हाम्राे संविधानकाे परिकल्पना पूरा गर्न सक्छ र मुलुकलाई समुन्नत बनाउन सक्छाैं भन्ने प्रत्याभूति दिन जरुरी रहेकाे भन्दै उहाँले सबै मिलेर अगाडि बढ्न नसके त्याे स्थिति बन्न नसक्ने बताउनुभयाे ।
संसद् काम नलाग्ने ठाउँ हाे भन्ने सन्देश बाहिर गयाे भने व्यवस्थाका लागि नै घातक हुने समेत प्रमुख सचेतक लेखकले बताउनुभयाे । 'यदि याे संसद् काम नलाग्ने ठाउँ हाे भन्ने सन्देश बाहिर सम्प्रेषण भयाे भने याे व्यवस्थाका लागि त्याे भन्दा ज्यादा घातक केही हुन सक्दैन, कहिँ हाम्रा गतिविधिहरु यही संविधानका विरुद्धमा वातावरण बन्नेतिर निर्देशित त भइराखेका छैनन् त्यतातिर साेच्नुपर्ने हुन्छ'- उहाँले भन्नुभयाे ।
संसद्लाई बढी भन्दा बढी प्रभावकारी बनाउनुपर्ने प्रमुख सचेतक लेखकले बताउनुभयाे । नेपाली जनताले यही व्यवस्थामार्फत, यही संसद्का मार्फत यो मुलुकमा दिगो शान्ति, सुशासन र दिगो विकासको अपेक्षा राखेका र त्यो आशयका साथ हेरिरहेका उहाँले बताउनुभयाे ।
प्रमुख सचेतकले देश र जनताका हितमा काम गर्दा आलाेचना-प्रत्यालाेचनाका विषय स्वस्थ राख्न संसद् अवरुद्ध नगर्न र अत्यन्त संयमित भएर प्रस्तुत हुन आग्रह गर्नुभयाे । आज केही समय हामीले संसद् अवरुद्ध हुने स्थिति बन्याे,
याे अधिवेशनबाट धेरै विधेयक पास गर्नुपर्ने भन्दै उहाँले सबै मिलेर अगाडि बढ्नुपर्ने बताउनुभयाे । आउने पुस्तालाई के सिकाउँदैछौं र हाम्रो गतिविधिबाट उनीहरूले के सिक्दैछन् भन्ने कुरामा सांसद्हरु गम्भीर हुनुपर्ने प्रमुख सचेतक लेखकले बताउनुभयाे । 'आउने पुस्ताका भाेलि याे देशकाे जिम्मेवारी लिने भाइबहिनीहरु आएर हामीलाई हेरीराख्नुभएकाे छ, कमशेकम तिनीहरुलाई हेरेर आफूलाई तयार गराैं, हामीले कसरी प्रस्तुत हुने भन्नेमा ध्यान दिऔं'- उहाँले भन्नुभयाे ।
प्रतिपक्षकाे धर्म विराेध गर्नु रहेकाे भन्दै प्रमुख सचेतक लेखकले प्रतिपक्षले सरकारकाे आलाेचना गर्याे भनेर सरकार आतंकित र सत्तापक्ष आक्राेशित हुनुपर्ने कुनै कारण नरहेकाे समेत बताउनुभयाे ।
