काठमाडाैं । नेपाली कांग्रेसका सांसद डा. सुनिल शर्माले पर्यटकहरूले २५ हजार भन्दा बढी भारतीय मुद्रा बोकेर नेपाल आउन नमिल्ने निर्णय संशोधन गर्नुपर्ने बताउनुभएकाे छ ।
प्रतिनिधि सभाको आइतबारको बैठकमा शर्माले गत फागुन ३ गते त्रिभूवन अन्तर्राष्ट्रिय विमानस्थलमा टर्कीका कार्डियोलोजिस्ट अब्दुल्लाह मिनीलाई ९६ हजार भारतीय रकम ल्याएकोमा पक्राउ गरिएकोबारे सरकारको ध्यानाकर्षण गराउँदै २५ हजार भारतीय रकम भन्दा बढी बोकेर आउन नपाइने निर्णय संशोधन गर्न माग गर्नुभएकाे हाे ।
'त्रिभुवन अन्तर्राष्ट्रिय विमानस्थलमा एउटा घटना भयो । एकजना टर्कीबाट आउनुभएको अन्तर्राष्ट्रिय स्तरको कार्डियोलोजिस्ट गंगालाल अस्पतालमा आउँदै हुनुहुन्थ्यो । केही नयाँ प्रविधियुक्त कामहरू भइरहेका थिए । उहाँलाई गिरफ्तार गरियो । गिरफ्तार गर्नुको कारण उहाँले ९६ हजार आइसी बोकेर आउनुभएको रहेछ । त्यो कारणले उहाँलाई गिरफ्तार गरियो । मैले यो सदनमा पटक-पटक आवाज उठाएको छु,' उहाँले भन्नुभयाे- '२५ हजार भन्दा बढी आइसी पर्यटकहरूले चाहे सडकबाट आउँदा होस् वा एयरलाइन्सबाट आउँदा होस्, बोक्न नपाउने व्यवस्था गरिरहँदाखेरी नेपालको पर्यटन क्षेत्र फस्टाउनको निम्ति हामीले बनाएको हो वा नेपालका होटल उद्योगहरू डुबाउनेका निम्ति बनाएको हो ? सरकार, यो देशका प्रधानमन्त्री, यो राज्य सत्तालाई यो कुरा थाहा छ की छैन ? वा थाहा पाएर पनि हामीले पटक-पटक भन्दा पनि सुतेर किन बसेको ? अब्दुल्लाह मिनी भन्ने जसलाई समातिएको हो, प्रमाण मसँग छ । उनले त्यहाँबाट छुट्दा ४ लाख ६१ हजार २३२ रुपैयाँ पैसा नेपालभित्र उनका साथीहरूसँग सापटी लिएर धरौटी राखेर छुट्नुभयो ।'
'म प्रश्न सोध्न चाहन्छु यो मुलुकको प्रधानमन्त्रीलाई, तपाईंले कस्तो टुरिस्ट ल्याउन खोजेको हो ? २५ हजारभन्दा बढी आइसी बोक्न नपाउने, अनि यो देशमा हातमा एक रुपैयाँ पैसा नभएका भिखारीलाई मात्रै ल्याएर टुरिस्ट इण्डस्ट्री चलाउने हो ? होइन भने यो कानुन वा नियम २४ घण्टामा परिवर्तन गर्नुपर्छ । मुलुक कंगाल बनाउने हो भने यो निर्णयलाई निरन्तरता दिनुपर्छ’ प्रश्न गर्दै उहाँले भन्नुभयाे ।
सांसद शर्माले सरकार गैरजिम्मेवारपूर्ण ढंगबाट चलिरहेको बताउँदै संसदमा प्रतिपक्ष बोलिरहँदा सत्तापक्षका सांसदहरूले बोल्न नदिनका लागि नियमापत्ति जनाउने गरेकाे उहाँकाे भनाईं थियाे ।
सांसद्मा राप्रपाका सांसद ज्ञानबहादुर शाही बाेल्दै गर्दा सत्तापक्षका सांसद्ले नियमापत्ति जनाएका थिए । यसै बिषयमा शर्माले पनि नियमापत्ति जनाउँदै प्रतिपक्षलाई सत्तापक्षले बाेल्न नदिने प्रपन्च रचिरहेकाे बताउनु भएकाे थियाे ।
'उहाँले म जेलबाट छुटेर आएपछि पनि नियमापत्ति जनाउनुभएकाे थियाे' शर्माले भन्नुभयाे- 'सत्ता पक्षका सांसदले प्रतिपक्षका आवाज कुन्ठित गर्न खाेजेका छन् । प्रतिपक्षले आफ्नाे कुरा मजाले राख्न पाउनु पर्छ । प्रतिपक्ष बाेलेकाे बेला सत्तापक्षका सांसद्ले नियमापत्ति जनाउनु हुँदैन ।'
