काठमाडौं । प्रतिनिधि सभा सदस्य ज्ञानबहादुर शाहीले प्रतिनिधि सभामा पीडितका पक्षमा बोल्दा आफ्नो राजीनामा मागिएको भन्दै आपत्ति जनाउनुभएको छ ।
बालकुमारी घटनामा छानबिन आयोगले दोषी ठहर्याएका मन्त्री प्रकाश ज्वालालाई कारबाही माग गर्दा संसद्मा आफ्नो राजीनामा मागिएको भन्दै उहाँले आपत्ति जनाउनुभएको हो । आइतबार प्रतिनिधि सभा बैठकमा बोल्दै शाहीले जनताबाट निर्वाचित भएर आएको सांसदको राजीनामा माग्ने हक कसैलाई नभएको बताएको बताउनुभयो ।
यस अघि बसेको प्रतिनिधि सभा बैठकमा शाहीले मन्त्रीको राजीनामा माग गर्दा नेकपा माओवादीबाट निर्वाचित सांसद माधव सापकोटाले राजीनामा दिएर रत्नपार्कमा जान सुझाव दिनुभएको थियो । आजको बैठकमा शाहीले त्यसको प्रतिवाद गर्नुभएको हो । संविधानले दिएको अधिकार प्रयोग गरेर आफूले सार्वभौम संसदमा बोलेको बताउनुभयो ।
शाहीले आफू आठ वर्षको बच्चालाई घाँटी काटेर, मान्छेको हत्या गरेर र राज्यको सम्पत्ति विनाश गरेर संसदमा नआएको बताउनुभयो । उहाँले जनताको आवाज दबाएर नदबिने पनि प्रष्ट पार्नुभयो र यस्तो कविता पनि सुनाउनुभयो :
‘फक्रक्क फुल्न नपाउँदै कोपिला मै चुँडाइदियौ
दुई नौजवान युवाको सपना बालकुमारीमै उडाइदियौ
थिए होला तिनीहरूका सपना न्यानो लगाउने र मिठो खाने
रक्षक नै भक्षक भए पछि सम्माननीय सभामुख महोदय न्याय खोज्न हामी कहाँ जाने ?
आँखाबाट आँसु झार्दै भक्कानिएर रुन्छिन् उनकी आमा
अपराधीलाई कारबाही गर भनी आवाज उठाउँदा माग्छौ मेरो राजीनामा ?
सत्ता तिम्रै छ, शक्ति तिम्रै छ जति दबाउन सक्छौ दबाऊ
दबिएर दबिँदैन यी आवाजहरू एक दिन उठ्नेछन्
र भन्नेछन् भ्रष्टाचारी र देशद्रोहीलाई देशबाटै भगाऊ’
