काठमाडाैं । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्दनेले बालकुमारी घटना, मिटरब्याज पीडित, लघुवित्त पीडित र दुग्ध किसानको भुक्तानीकाे विषयमा सरकारकाे ध्यानाकर्षण गराउनुभएकाे छ ।
सोमबार बसेको प्रतिनिधि सभा बैठकको सुरूमै सभामुखसँग समय लिएर राप्रपा अध्यक्ष राजेन्द्र लिङदेनले लामाे सयमदेखि यी विषय उठाउँदा पनि सरकारले सुनेर पनि नसुनेजसरी र देखेर पनि नदेखे जसरी बस्नु दु:खद भएकाे बताउनुभयाे । उहाँले मिटरब्याज पीडित, लघुवित्त पीडित र दुग्ध किसानकाे समस्या सरकारले अनदेखा मात्र नभइ उनीहरुकाे पीडामाथि हासिमजाक गरेकाे बताउनुभयाे ।
आगामी बैठकसम्म मिटरब्याज पीडित, लघुवित्त पीडित र दुग्ध किसानको माग सम्बोधन नभए र ठाेस जवाफ नआए राप्रपाले सदन अवरुद्ध गर्ने चेतावनी अध्यक्ष लिङ्देनले दिनुभयाे । राप्रपा संसद्बाट बाहिरिन तयार रहेकाे तर यी विषयमा संसद् र सडक दुवैतर्फ अडिग रहने उहाँले बताउनुभयाे ।
सर्वहारा वर्गको अवस्था के छ भनेर बुझ्न भृकुटीमण्डप र सिफलमा बसेका पीडितलाई हेर्न समेत अध्यक्ष लिङ्देनले प्रधानमन्त्री पुष्पकमल दाहाल प्रचण्डलाई चुनाैती दिनुभयाे ।
उहाँले बालकुमारी घटनामा दाेषी ठहरिएका भाैतिक मन्त्री प्रकाश ज्वालाकाे राजीनामा पनि माग्नुभयाे ।
