काठमाडाैं । राष्ट्रिय स्वतन्त्र पार्टी (रास्वपा) का सभापति रवि लामिछानेले सभामुखकाे रुलिङ समेत सरकारले बेवास्ता गरिरहेकाे भन्दै आपत्ति जनाउनुभएकाे छ ।
साेमबार बसेकाे प्रतिनिधि सभा बैठकमा सभामुखसँग समय लिएर बाेल्दै सभापति लामिछानेले सभामुखले ३ पटक रुलिङ गर्दा समेत सरकाले जवाफ दिन नसक्नु दु:खद भएकाे बताउनुभयाे
आराेपित मन्त्रीहरुलाई सदनमा जवाफ दिन केले राेक्याे भन्ने प्रश्न उहाँले गर्नुभयाे । 'याे कुरा किन जटिल बनाइएकाे छ, संसद्लाई आरोप प्रत्यारोपको क्षेत्र किन बनाइँदैछ ? सभामुखबाट रुलिङ भइसकेकाे विषयमा सरकारका केही मन्त्रीहरूले आफूलाई लागेको गम्भीरआरोपका विषयमा याे सदनमा उभिएर जवाफ दिन रोकेको छ के ले ? किन याे निरन्तर मागिपर्याे ? यदि कुनै अप्ठ्यारो छैन, आफूमाथि उठेका आरोपका जवाफ दिनसक्ने यथेष्ट आधारहरू छन्, ती आरोप या विषय निराधार हो भने संसद्मा उभिएर भन्नका लागि सदनमा उभिएर बाेल्न सरकारले के ले राेक्याे ?'- सभापति लामिछानेले भन्नुभयाे ।
उहाँले मिटरब्याज पीडितकाे विषयमा एेतिहासिक काम गर्याैं र सामन्तवादकाे अवशेष समाप्त पार्याैं भन्ने सरकारले मिटरब्याज पीडित २३ दिन हिँडेर काठमाडाैं आउने अवस्था किन आयाे भन्ने जवाफ दिनुपर्ने बताउनुभयाे । 'अनि त्यसाे हाे भने २३ दिनसम्म हिँडेर उहाँहरु यहाँसम्म आउने अवस्था किन आयाे, किन राेकिएन, गाेडा फुट्नेगरी यहाँसम्म हिँड्न किन बाध्य पारियाे ?'- सभापति लामिछानेकाे प्रश्न छ ।
सरकार र सरकारका मन्त्रीले सदनमा उभिएर जवाफ दिनुकाे साटाे मिडियामा गएर ओठे जवाफ फर्काउने काम भइरहेकाे भन्दै उहाँले आपत्ति जनाउनुभयाे । 'सदनमा द्वन्द्वको परिस्थिति छ, सडकमा उस्तै छ, सडकमा आन्दाेलन नगर्ने, सरकारलाई चुनाैती नदिने, ध्यानाकर्षण नगराउने कुनैपनि क्षेत्र छैन, सडकमा दूध फालेर किसान आन्दोलन गरिरहेका छन्, सरकारले सदन र सडक हरेक ठाउँमा विरोध गर्ने ठाउँ दिएको छ, यस्ताे परिस्थितिमा यहाँ उभिएर उठेका प्रश्नकाे जवाफ दिनुको सट्टा यो मिडियामा गएर ओठे जवाफ दिने ? सभामुखबाट रुलिङ भइसक्दा पनि बेवास्ता गर्ने के याे लाेकतान्त्रिक पद्धति हाे ?'- सभापति लामिछानेकाे प्रश्न छ ।
कुनै पनि प्रतिपक्ष दलले सदन अवरुद्ध गर्न नचाहेका भन्दै उहाँले सरकारले जवाफ दिन बेवास्ता गरेकाे बताउनुभयाे । सदनमा कैयाैं विषयमा छलफल गर्नुपर्ने भन्दै सभापति लामिछानेले दिनदिनै राजीनामा माग्ने जाने काम स्वीकार्य नहुने बताउनुभयाे ।
उहाँले सरकारलाई स्पष्ट रुलिङ दिनुपर्ने माग पनि उहाँले गर्नुभयाे ।
