हाउसमा बोलेको कुरा कार्यान्वयनमा आउँछ भन्ने लागेको थियो, यथार्थ अर्कै रहेछ : इन्दु कडरिया

काठमाडौं । राष्ट्रिय सभा सदस्य इन्दु कडरियाले संसद्मा बोलेका कुराको सुनुवाइ नहुनु दुःखद विषय भएको बताउनुभएको छ ।

बिहीबार राष्ट्रिय सभा बैठकमा आफ्नो ६ वर्षीय कार्यकालको अनुभव सुनाउँदै कडरियाले संसद्मा बोलेको कुरा कार्यान्वयनमा आउँछ भन्ने आफ्नो अपेक्षामा ६ वर्षीय कार्यकालको अनुभवले ठेस लगाएको बताउनुभयो । ‘सदनमा आउँदै गर्दा मेरो अपेक्षा निक्कै ठुलो थियो, मलाई लाग्थ्यो हाउसमा बोलिसकेपछि त्यो कार्यान्वयनमा आउँछ, तर यथार्थ अर्कै रहेछ’, उहाँले भन्नुभयो ।

बोलेको संसदमा रेकर्ड रहने, मिडियामा आउने तर बोलेको कुरा कार्यान्वयन गर्नुपर्ने सरकारले सुनेको नसुनेकै गर्ने तितो यथार्थ लिएर आफू संसदबाट बाहिरिन लागेको उहाँले बताउनुभयो । आफूले राष्ट्रिय सभामा उठाएका विषयमा जनताबाट राम्रो प्रतिक्रिया आएको भए पनि उठान गरेका विषय भने सम्बोधन नभएको कडरियाले दुखेसो गर्नुभयो ।