काठमाडौं । राष्ट्रिय सभा सदस्य देवेन्द्र दाहालले सरकारसँग विश्वासको वातावरण नभएको बताउनुभएको छ ।
बिहीबार राष्ट्रिय सभा बैठकमा विनियोजन विधेयकको सिद्धान्त र प्राथमिकता विषयको छलफल छलफलमा भाग लिँदै दाहालले सरकार र मन्त्रीले आफ्नो धर्म समेत निर्वाह गर्न नसकेको बताउनुभयो । ’मलाई विश्वास छैन यो सरकारसँग, सरकार आफैँ धरमराएको हो कि जस्तो लागिरहेको छ, सम्बन्धित मन्त्रीहरूको कुर्सी पनि हल्लिएको जस्तो लागिरहेको छ’, उहाँले भन्नुभयो ।
दाहालले गठबन्धन मन्त्री पहुँचवाला सांसद् भन्दा माथि उठ्न नसकेका र नसक्ने उहाँले बताउनुभयो । अब आउने बजेट पनि पहुँचवालाकै नियन्त्रणमा आउने उहाँले बताउनुभयो ।
सरकारले ल्याएको सिद्धान्त र प्राथमिकता गत वर्षको कपि-पेष्ट मात्रै भएको उहाँले बताउनुभयो । सरकारको प्राथमिकतामा देशका विकास र समृद्धि पर्न नसकेको बताउनुभयो ।
उहाँले सरकारको गन्तव्य माथि नै प्रश्न गर्नुभयो । ‘यो सरकाको गन्तव्य पुँजीवाद हो कि समाजवाद हो ?’ उहाँले भन्नुभयो ।
संविधानको प्रस्तावनामा समाजवाद उन्मुख समाज निर्माण गरिने उल्लेख गरिएको भए पनि सरकाको प्राथमिकता भने दलाल पुँजीवादी तर्फ रहेको उहाँले बताउनुभयो । दलाल पुँजीवादले देशको उत्थान हुन नसक्ने दाहालले प्रष्ट पार्नुभयो । देश निर्माणको लागि राष्ट्रिय पुँजी निर्माण गर्नु पर्ने र त्यसको लागि कृषिमा आधुनिकीकरणका लागि लगानी गर्नुपर्नेमा उहाँले जोड दिनुभयो । कृषिलाई पहिलो प्राथमिकता राख्नु पर्नेमा सरकारले विद्युत् व्यापारलाई पहिलो प्राथमिकतामा राखेको भन्दै उहाँले आलोचना गर्नुभयो ।
