काठमाडौं । सभामुख देवराज घिमिरेले प्रतिपक्षी दलले सदनमा उठाएका विषयमा फागुन २१ गतेको बैठकमा जवाफ दिन सरकारलाई पुनः रुलिङ गर्नुभएकाे छ ।
शुक्रबार प्रतिनिधि सभा बैठक सुरु हुनासाथ प्रमुख प्रतिपक्ष नेकपा एमालेसहित प्रतिपक्षी दलले सरकारको जवाफ माग्दै सदन अवरुद्ध गर्ने चेतावनी दिएपछि सभामुख घिमिरेले सरकारलाई पुन: रुलिङ गर्नुभएकाे हाे ।
आज बैठक सुरु हुनासाथ एमाले सांसद् सूर्य थापाले सरकारको खोजी गर्न समिति नै बनाउनुपर्ने हाे भन्दै प्रश्न गर्नुभएकाे थियाे । उहाँले बालकुमारी घटनामा दाेषी करार मन्त्रीलाई कारबाही गर्न के ले राेक्याे भन्ने प्रश्न गर्दै दुग्ध किसानको विषय, मिटरब्याजपीडित तथा बैंक तथा वित्तीय संस्थाको ऋणीको समस्यामा सरकारको जवाफ माग्नुभएकाे थियाे ।
त्यसपछि राप्रपाका अध्यक्ष राजेन्द्र लिङ्देनले मिटरब्याज तथा लघुवित्त पीडित, सहकारी पीडित, दूग्ध किसानकाे माग, नेपालीहरु रुसी सेनामा गएकाे विषयमा सरकारले ठाेस जवाफ नदिएसम्म सदन अगाडि बढाउन नसकिने चेतावनी दिनुभयाे ।
लिङ्देनले बाेलेर सक्नासाथ एमाले, राप्रा र रास्वापाका सांसद् उठेर विराेध जनाए । यी विषयमा सरकारकाे जवाफ चाहिने अडान लिए । त्यसपछि सभामुख घिमिरेले रुलिङ गर्नुभयाे ।
याेसँगै सभामुखले चालु अधिवेशन सुरु भएपछि चाैथाे पटक रुलिङ गरिसक्नुभएकाे छ । तर सरकारले जवाफ भने दिएकाे छैन । यसअघि फागुन १०, ११, १२ र १४ गतेको बैठकमा पनि सभामुखले रुलिङ गर्नुभएकाे थियाे ।
एमालेले बालकुमारी हत्याकाण्डमा भाैतिक मन्त्री प्रकाश ज्वाला, टेरामस्क भ्रष्टाचार काण्डमा स्वास्थ्य मन्त्री मोहन बस्नेत र रामग्रामकाे जग्गा निजी कम्पनीलाई लिजमा दिने काण्डमा पर्यटनमन्त्री सुदन किराँतीको राजीनामा माग्दै आएको छ । एमालेले मिटरब्याज पीडितका समस्या समाधान गर्न र दूग्ध किसानकाे भुक्तानी दिन पनि एमालेले सरकारसँग माग गरेकाे छ । अरु प्रतिपक्षी दलले पनि यी विषयमा सरकारकाे ध्यानाकर्षण गराउँदै आएका छन् । तर सभामुखले पटकपटक रुलिङ गर्दा पनि सरकारले बेवास्दा गर्दै आएकाे छ ।
