काठमाडाैं । नेपाल राष्ट्र बैंकका गभर्नर महाप्रसाद अधिकारीले बैंकिङ क्षेत्र र नियमन निकायलाई कमजोर बनाउन धाराप्रवाह रुपमा आक्रमण भइरहेकाे बताउनुभएकाे छ ।
आइतबार बसेको प्रतिनिधि सभाको अर्थसमितिकाे बैठकमा गभर्नर अधिकारीले बैंक तथा वित्तीय संस्थाविरुद्ध भइरहेको अराजक गतिविधिले बैंकिङ प्रणालीको मनोबल गिराउने काम गरिरहेको बताउनुभयाे । बैंक वित्तीय क्षेत्रमाथिको अराजकता तत्काल नरोकिए यसले क्षति पुर्याउने भन्दै उहाँले यस्ता आक्रमण र अराजक गतिविधि सरकारले राेक्नुपर्ने बताउनुभयाे ।
गभर्नर अधिकारीले अराजकतालाई रोक्न नसके सोचे अनुसारको कर्जाको माग हुने र कर्जा प्रवाह हुने अवस्था नरहने समेत बताउनुभयो । अराजक गतिविधिका विषयमा प्रधानमन्त्री, अर्थमन्त्री र सचिवहरुसहित बसेर छलफल भइसकेकाे उहाँले बताउनुभयाे । 'यो अराजकतालाई रोक्न सकेनौँ भने सोचेअनुसारको कर्जाको माग हुने र कर्जा प्रवाह हुने अवस्था छैन, यसले एक किसिमबाट ठूलो बैंकिङ प्रणालीमा मनोबल गिराउने काम गरिरहेको छ'- गभर्नर अधिकारीले भन्नुभयाे ।
बैंकहरुलाई राष्ट्र बैंकले मोनिटरिङ गरिरहेको भन्दै उहाँले नेपालका बैंकहरु सुरक्षित रहेको पनि बताउनुभयाे । नेपालका बैंकहरुको अवस्थालाई हेरेर नै विदेशी बैंकहरुले नेपाललाई विश्वास गरिरहेको गभर्नर अधिकारीले बताउनुभयाे ।
ऋण मिनाहा हुन्छ भन्ने अराजक हल्लाहरु बजारमा चलाइएकाले ऋण असुलीमा केही समस्या देखिएको बताउनुभयाे ।
अहिले बैंकसँग लगानी गर्ने ६ खर्ब रुपैयाँको तरलता रहेको र खराब कर्जा ३ दशमल ४० प्रतिशत पुगेको जानकारी दिनुभयो ।
