काठमाडौं । प्रधानमन्त्री पुष्पकमल दाहाल प्रचण्डले देश विकासको गेयर परिवर्तनको लागि सत्ता समीकरण फेर्नु परेको बताउनुभएको छ ।
बुधबार प्रतिनिधि सभा बैठकमा विश्वासको मत माग्दै प्रचण्डले राष्ट्रको वृहत् हितको लागि सत्ता समीकरण बदल्नु परेको बताउनुभयो । ‘सरकारको गेयर परिवर्तन गर्ने हो भने सरकार र गठबन्धन पुनर्गठन गर्नै पर्ने अवस्था मैले महसुस गरेँ’, दाहालले भन्नुभयो ।
आफूले गरेको कामबाट आफैँ सन्तुष्ट हुन नसकेको उहाँले बताउनुभयो । त्यस कारण पटक पटक सरकार पुनर्गठन गर्न खोजेको भए पनि त्यसमा कांग्रेसले अवरोध गरेको दाहालले सुनाउनुभयो ।
उहाँले आफूले लोकतान्त्रिक प्रक्रियाबाट नै गठबन्धनको समीकरण बदलेको बताउनुभयो । त्यसैले आफू कुनै धोकेबाज नभएको बताउनुभयो ।
पछिल्लो एक वर्षमा कांग्रेस भित्रका विचार समूहले सरकार र गठबन्धनमा पारेको प्रभावले आफू आजित भएको उहाँले बताउनुभयो । आफ्नो कदमले कांग्रेस भित्र राम्रो एकता कायम भएको भन्दै उहाँले खुसी व्यक्त गर्नुभयो । नयाँ गठबन्धन बन्दा नेपाली कांग्रेस भित्रको कचिङ्गल समाधान गर्न सहयोग पुग्ने उहाँले विश्वास व्यक्त गर्नुभयो ।
आफू नेपाली कांग्रेसको समर्थनमा एक पटक प्रधानमन्त्री भए पनि आफूले समर्थन गरेर शेरबहादुर देउवालाई दुई पटक प्रधानमन्त्री बनाएको प्रचण्डले स्मरण गराउनुभयो । अहिले प्राप्त गरेको प्रधानमन्त्री नेपाली कांग्रेसको विश्वासघातको जगमा खडा भएको कुरा नबिर्सन उहाँले कांग्रेसलाई आग्रह गर्नुभयो ।
नेपाली कांग्रेलाई आफूले लगाएको गुनलाई चटक्कै बिर्सिएर आफूलाई धोकेबाजको संज्ञा दिएको भन्दै उहाँले आपत्ति जनाउनुभयो । एमालेले आफूलाई प्रधानमन्त्री बनाउने बित्तिकै कांग्रेलाई राष्ट्रपति बनाएको कुरा नबिर्सन उहाँले आग्रह गर्नुभयो । ‘बरु धोका त केपी ओलीजीले भनेको भए सुहाउँदो हुन्थ्यो’, उहाँले भन्नुभयो ।
नेपाली कांग्रेसले कोशीको मुख्यमन्त्री बनाउने, राष्ट्रिय सभा सदस्य निर्वाचन लगायत हरेक घटनामा माओवादीलाई धोका दिएको उहाँले बताउनुभयो । कांग्रेसको महासमिति बैठकले गठबन्धनकै अवमूल्यन गर्ने गरी गरिएको बहस र संविधान माथि नै प्रश्न उठाउने कार्यले आफूलाई चिन्तित बनाएको उहाँले सुनाउनुभयो ।
उहाँले राष्ट्रिय मुद्दामा भविष्यमा पनि सहयात्रा गरेरै जान आवश्यक रहेको बताउनुभयो । ‘एक माघले जाडो जाँदैन’, उहाँले भन्नुभयो ।
