काठमाडौं । सत्ता गठबन्धनकाे प्रमुख घटक नेकपा एमालेका अध्यक्ष केपी शर्मा ओलीले नेपाली कांग्रेसलाई इमानका कुरा गर्न नसुहाउने बताउनुभएकाे छ ।
बुधबार बसेकाे प्रतिनिधि सभा बैठकमा प्रधानमन्त्री पुष्पकमल दाहाल प्रचण्डले राख्नुभएकाे विश्वासको मतसम्बन्धी प्रस्तावमाथिको छलफलमा बाेल्दै अध्यक्ष ओलीले पटक-पटक धाेका दिएकाे कांग्रेसले इमानका कुरा गर्दा आफूलाई अचम्म लागेकाे बताउनुभयाे ।
अस्थिरताको कारण कांग्रेस भएकाे संकेत गर्दै अध्यक्ष ओलीले गत वर्ष २ महिनामा सरकार परिवर्तन गरेर अस्थिरताको सुरूआत गरेकाे बताउनुभयाे । उहाँले भन्नुभयाे - 'हामी प्रतिष्पर्धाको प्रणाली ल्याऔं, कसैसँग बुहमत छैन, अस्थिरताकाे खेती यहाँहरुले गर्नुभएकाे हाे, पोहोर दुई महिनामा सरकार परिवर्तन गर्दा अस्थिरता लागेन, अनि अहिले एक वर्षपछि, १४ महिनापछि सरकार परिवर्तन हुँदा केकाे अस्थिरता ? शान्तिपूर्ण ढंगले सरकार परिवर्तन गरेकाे हाेइन तपाइँहरुले पाेहाेर ?'
देशकाे परिस्थिति सुखद नभएकाे, विभिन्न नाममा राष्ट्रिय एकतामा भाँजाे हाल्ने प्रयास भइरहेकाे अध्यक्ष ओलीले बताउनुभयाे । भूगाेल, जात, पहिचान धर्मका नाममा विद्वेष फैलाउने प्रयास भइरहेको भन्दै उहाँले याे मुलुक कुनै एउटा जाति विशेषको, धर्म विशेषको र भूगोल विशेषको नभएकाे बताउनुभयाे ।
आवेश-उत्तेजनामा नजान कांग्रेसलाई आग्रह गर्दै उहाँले देशकाे अर्थतन्त्र सुधारका लागि मिलेर जानुपर्ने अवस्था रहेकाे बताउनुभयाे । देशलाई अगाडि बढाउनुपर्ने भन्दै अध्यक्ष ओलीले पछाडि फर्काउने प्रतिगामी कुरा स्वीकार्य नहुने बताउनुभयाे ।
एमालेले विराेधका लागि विराेध नगर्ने अध्यक्ष ओलीले प्रष्ट पार्नुभयाे । प्रधानमन्त्री भन्दा पहिला विपक्षी दलका नेता बाेल्न पाउनुपर्छ भनेर वेल घेर्ने, नीति तथा कार्यक्रम पेस गर्न नदिने कांग्रेस नै भएकाे समेत उहाँले बताउनुभयाे ।
