काठमाडौं । प्रतिनिधि सभामा एमाले संसदीय दलका नेता केपी शर्मा ओलीले नयाँ सत्ता समीकरणमा प्रधानमन्त्रीको भागबण्डाको विषयमा कुनै कुरा नभएको स्पष्ट पार्नुभएको छ ।
बुधबार प्रतिनिधि सभा बैठकमा बोल्दै ओलीले सञ्चारमाध्यममा फैलाइएका यस्ता कुराले नयाँ गठबन्धनको अवमूल्यन गर्ने काम गरेको बताउनुभयो । प्रधानमन्त्रीको कार्यकाल १५/१५ महिना बाँडेको भन्ने कुरा गलत भएको उहाँले बताउनुभयो । ‘यसले यो सरकार परिवर्तन किन भएको हो, यसमा नेताहरू सहकार्य किन गरेका हुन् भन्ने कुराको गरिमालाई घटाएको छ, यो अनुचित कुरा हो, गलत कुरा हो’, ओलीले भन्नुभयो ।
ओलीले प्रधानमन्त्रीको विषयमा कुनै भागबण्डा नभएको प्रष्ट पार्नुभयो । प्रधानमन्त्रीको लागि कुनै भागबण्डा नभएको उहाँले बताउनुभयो । प्रधानमन्त्रीको भागबण्डामा आफ्नो नाम पनि जोडिएको भन्दै उहाँले आपत्ति जनाउनुभयो । ‘यो प्रधानमन्त्री हुनकै लागि हामीले यस्तो गरेको होइन, मलाइ प्रधानमन्त्री हुन इच्छा पनि छैन’, उहाँले भन्नुभयो ।
उहाँले सबै राजनीतिक दललाई रचनात्मक ढङ्गले अघि बढ्न पनि आग्रह गर्नुभयो । देशका समस्या समाधानको लागि केही गरौँ भन्ने इच्छाको साथ आफूहरूले यो काम गरेको उहाँले बताउनुभयो । नेपाली कांग्रेसँग पनि आफूले देशका बारेमा कुरा गरौँ न भनेर बारम्बार भनेको ओलीले स्मरण गराउनुभयो ।
