काठमाडौं । प्रतिनिधि सभा सदस्य राजेन्द्र पाण्डेले प्रधानमन्त्री पुष्पकमल दाहाल प्रचण्ड अति छिटो रङ्ग फेर्ने व्यक्ति भएको बताउनुभएको छ ।
बुधबार प्रतिनिधि सभा बैठकमा बोल्दै पाण्डेले यो कुराले नेपाली राजनीतिलाई विश्वासको बाटोमा नलैजाने बताउनुभयो । प्रचण्डले आफ्नो पार्टीलाई खालाको बगरमा फालेको मुढो जस्तै गरी फालेको पाण्डेले आरोप लगाउनुभयो ।
नयाँ सत्ता समीकरण बनाउने बेला पार्टी भित्रबाट विद्रोह गरेर बनेको शक्ति एकीकृत समाजवादीलाई प्रचण्डले अपमानित ढङ्गले छाडेर हिँडेको उहाँले बताउनुभयो । ‘यो भन्दा अनैतिकता के हुन्छ ? एकचोटी हाम्रो पार्टीको ठाउँमा सोच्नुस्, ओलीजी र शेरबहादुरजीले घाँटी जोडे भने तपाईँको हालत के हुन्छ ?’ उहाँले प्रश्न गर्नुभयो ।
हिजो कांग्रेसकै भोट पाएर चुनाव जित्नु भएको प्रचण्डले आज कांग्रेस सबै कोणबाट बेठिक हो भन्नु गलत भएको उहाँले बताउनुभयो । त्यसैले समय अनुसार रङ्ग नफेर्न उहाँले प्रधानमन्त्रीलाई सुझाव दिनुभयो ।
