काठमाडौं । जनता समाजवादी पार्टी (जसपा) नेपालका सांसद् राजकिशोर यादवले प्रधानमन्त्री पुष्पकमल दाहाल प्रचण्डालाई इतिहास रच्ने यो अन्तिम क्षण भएको बताउनुभएकाे छ ।
बुधबार बसेकाे प्रतिनिधि सभा बैठकमा प्रधानमन्त्री पुष्पकमल दाहाल प्रचण्डले राख्नुभएकाे विश्वासको मतसम्बन्धी प्रस्तावमाथिको छलफलमा बाेल्दै सांसद् यादवले पटकपटक सहयात्री फेर्दै सरकारमा टिकिरहने प्रधानमन्त्रीकाे प्रवृत्ति विचित्र रहेकाे बताउनुभयाे ।
आफूहरुले सत्ताकाे सशक्त घटक भएकाे र प्रतिबद्धता अनुसार आफूहरुलाई भाग चाहिने समेत उहाँले बताउनुभयाे । न्यायसंगत भाग नपाए अप्रिय घटना हुन सक्ने चेतावनी समेत सांसद् यादवले दिनुभयाे ।
सरकार बनेकाे एक साता नबित्दै ३ वटा प्रदेशका प्रदेश प्रमुख फेर्ने काम भएकाे तर त्यसमा एउटा पनि मधेशी अनुहार नपरेकाे भन्दै उहाँले आपत्ति जनाउनुभयाे । 'सरकार बनेकाे हप्ता दिन नबित्दै तपाइँले ३ वटा प्रदेश प्रमुख त्यहाँ मधेशीको अनुहार देखिएन, हामी पनि सत्ताको सशक्त घटक हौं,तपाइँले गरेकाे प्रतिबद्धता अनुसार हामी हाम्राे भाग खोज्छौं, यदि न्यायसंगत लागेन भने त्यतिबेला हिसाब माग्नेछौं र त्यो हिसाब अप्रिय पनि हुनसक्छ'- सांसद् यादवले भन्नुभयाे ।
प्रधानमन्त्री प्रचण्डले सहयात्रीहरु फेरेर आफ्नो शासन सत्ता लम्ब्याइरहेको उहाँले बताउनुभयाे । 'अरुमा त सहयात्रीका कारण प्रधानमन्त्री धरापमा पर्छन्, यहाँ त प्रधानमन्त्री होइन सहयात्रीहरू धरापमा परिरहेका छन्, संसद्मा आज जसरी दोहोरी चलेको छ, जुन प्रकारका भाषा प्रयोग भएको छ, एउटा प्रतिनिधिको नाताले सामान्य र राम्रो मान्ने ल्याकत मसँग छैन'- उहाँले भन्नुभयाे ।
यसअघि विश्वासको मत माग्दै गर्दा जस्तो ओज आज प्रधानमन्त्रीमा नदेखिएकाे उहाँले बताउनुभयाे ।
जनतामा पार्टीहरु र नेताहरुमाथि विश्वासको खडेरी देखिएकाे सांसद् यादवले बताउनुभयाे । प्रधानमन्त्री प्रचण्डको स्वभाव धेरै प्रयोग गरिरहने नेताका रुपमा रहेको भन्दै उहाँले आफूहरुलाई धेरै प्रयाेग नगर्न चेतावनी दिनुभयाे । 'यहाँ धेरै प्रयोग गरिरहने मान्छे हुनुहुन्छ, तर कहिलेकाहीँ धेरै प्रयोग गर्दा इनफ इज इनफ हुन सक्छ, मधेशसँग गरेका सम्झाैता लागू हुने आशा रहेकाे छ, जनतामा राजनीतिक चेतना बढेकाे छ ।
४-५ जना नेताले लाेकतन्त्रलाई सिण्डिकेटका रुपमा प्रयाेग गर्न खाेजेकाे आराेप उहाँले लगाउनुभयाे । आफूहरुले सरकारलाई समर्थन गर्ने र विश्वासको मत पनि दिने पनि सांसद् यादवले बताउनुभयाे ।
