काठमाडौं । प्रतिनिधि सभा सदस्य चन्द्रकान्त राउतले नेपालको राजनीतिमा धोकाधडि चलेको बताउनुभएको छ ।
बुधबार प्रतिनिधि सभा बैठकमा बोल्दै राउतले लामो भाषण गर्नुभन्दा यहाँ धोकाको राजनीति चल्छ भन्दा छोटोमा कुरा टुङ्गिने बताउनुभयो । उहाँले बारम्बार गठबन्धन बन्ने गरेको भए पनि त्यसले जनतालाई कुनै लाभ नदिएको बताउनुभयो । ‘यो गठबन्धन पटक पटक बन्छ, पटक पटक भत्किन्छ, बिग्रिन्छ, तर यसबाट जनताले के पाउँछ ?, तसबाट जनताले के लाभ पाउँछ, त्यस तर्फ हामीले धान दिन सकेको छैनौँ’, राउतले भन्नुभयो ।
राउतले अहिलेको परिस्थिति सिर्जना हुनुको मुख्य कारण चुनाव अघिको गठबन्धन भएको बताउनुभयो । ‘निर्वाचन अघि गठबन्धन गर्नु कति घातक हुन्छ भन्ने कुरा राजनीतिक दलले बुझ्नु पर्छ’, उहाँले भन्नुभयो ।
राउतले जनताले सांसदहरूलाई दिएको विश्वासको मत समेत जोगाउन नसकिएको बताउनुभयो । यसको लागि जनताबाट प्रत्यक्ष निर्वाचित प्रधानमन्त्री हुनु पर्ने राउतको राय छ ।
