काठमाडौं । पार्टी भित्रको चरम विवादको बिच नागरिक उन्मुक्ति पार्टीले प्रधानमन्त्री पुष्पकमल दाहाललाई विश्वासको मत दिने भएको छ । बुधबार प्रतिनिधि सभा बैठकमा बोल्दै पार्टी संसदीय दलकी नेता रञ्जिता श्रेष्ठले प्रधानमन्त्रीलाई आफ्नो पार्टीको समर्थन रहेको बताउनुभयो ।
रञ्जिताका पति तथा पार्टीका संस्थापक अध्यक्ष रेशम चौधारी वर्तमान सत्ता गठबन्धनको विपक्षमा उभिनु भएको बेला श्रेष्ठले भने प्रधानमन्त्रीलाई विश्वासको मत दिने स्पष्ट पार्नुभएको छ । यस अघि मंगलबार नै श्रेष्ठले प्रधानमन्त्रीलाई विश्वासका मत दिन सो पार्टीबाट निर्वाचित प्रतिनिधि सभा सदस्यलाई ह्विप जारी गर्नुभएको थियो ।
तर रेशम चौधरी पक्षले भने वर्तमान सत्ता गठबन्धनलाई समर्थन नरहेको विज्ञप्ति जारी गरेको थियो । बुधबार बिहानै रेशमले आफूले रञ्जितालाई सम्झाउन नसकेको भन्दै सामाजिक सञ्जाल फेसबुकमा स्ट्याटस लेख्नु भएको थियो ।
