काठमाडौं । नेकपा एकीकृत समाजवादी पार्टी सांसद् राजेन्द्र पाण्डेले प्रधानमन्त्री पुष्पकमल दाहाललाई केपी ओली र शेरबहादुर देउवा मिले भने के गर्नुहुन्छ भनि गर्नुभएको प्रश्नको जवाफमा आफूलाई नधम्क्याउन चेतावनी दिनुभएको छ ।
बुधबार प्रतिनिधि सभा बैठकमा पाण्डेले प्रचण्डले आफूहरूलाई बिचमा छाडेर अपमान गरेको अभिव्यक्ति दिएपछि त्यसको जवाफमा प्रचण्डले आफूलाई न धम्क्याउन चेतावनी दिनुभएको हो । उहाँले आफूलाई मन लागे विश्वासको मत दिन र मन नलागे नदिन पनि आग्रह गर्नुभयो ।
उहाँले सबै दल मिले भने माओवादी केन्द्र प्रतिपक्षमा बसेर रचनात्मक भूमिका खेल्न तयार रहेको बताउनुभयो । त्यसैले आफूलाई नधम्क्याउन उहाँले आग्रह गर्नुभयो । ‘तपाईँहरूलाई लागेको छ प्रचण्ड त्यसो भनेर डराउँछ भनेर, हिजो त तपाईँहरू सबै मिलेर टाउकै काट्न खोजेको हो नि त’, उहाँले भन्नुभयो ।
उहाँले कांग्रेस र एकीकृत समाजवादीलाई लक्षित गर्दै जति बेला जुन दलसँग मिल्दा फाइदा हुन्छ त्यही दलसँग मिल्ने स्पष्ट पार्नुभयो । ‘को राजनीतिक दल कति बेला कोसँग मिल्छ भन्ने कुरामा हरेक राजनीतिक दल स्वतन्त्र छन्, आफ्नो हिसाबकिताब राख्न, फाइदा हुन्छ भने मिल्ने हो’, उहाँले भन्नुभयो ।
उहाँले सत्ता पक्षमा हुने सांसदले प्रतिपक्षबाट ताली खाने गरी अभिव्यक्ति दिएको भन्दै आपत्ति जनाउनुभयो । उहाँको सङ्केत पाण्डे प्रति थियो । ‘म उहाँहरूलाई पनि भन्न चाहन्छु, तपाईँहरूलाई सहज छैन भने सहज छैन भने भइहाल्यो नि’, उहाँले भन्नुभयो ।
प्रधानमन्त्रीले दबाब दिएर मलाई समर्थन गर्नुस् भनेर कसैलाई पनि नभनेको उहाँले बताउनुभयो । उहाँले प्रधानमन्त्रीलाई एक पटक फेरी पनि समर्थन गर्नुपर्छ भन्ने लागे मत दिन र नभए मत नदिन आग्रह गर्नुभयो । ‘प्रधानमन्त्रीलाई धम्क्याउने तरिकाले पनि देशको हित हुँदैन’, उहाँले भन्नुभयो ।
