काठमाडौं । प्रतिनिधि सभा सदस्य बद्रीप्रसाद पाण्डेले नेपाली कांग्रेसलाई सत्ताबाट बाहिरिनुको अब कुनै गुनासो बाँकी नरहेको बताउनुभएको छ ।
बिहीबार प्रतिनिधि सभा बैठकमा बोल्दै पाण्डेले नेपाली कांग्रेस अब प्रतिपक्षीको भूमिकामा रहने बताउनुभयो । अब कांग्रेसले रचनात्मक र बलियो प्रतिपक्षीको भूमिका निर्वाह गर्ने उहाँले जानकारी दिनुभयो । ‘पुराना प्रधानमन्त्रीको नयाँ गठबन्धनलाई गुण र दोषको आधारमा समर्थन र विरोध गर्ने असल परम्पराको थालनी गर्न चाहन्छौँ’, उहाँले भन्नुभयो ।
जनताको धराशायी भएको विश्वास पुनर्जागृत गर्नु आजको आवश्यकता रहेको उहाँले बताउनुभयो । प्रधानमन्त्रीले उपप्रधानमन्त्री सहित गृह मन्त्रीमा अनुसन्धानको दायरामा रहेको व्यक्तिलाई ल्याएको भन्दै पाण्डेले आपत्ति जनाउनुभयो । ‘गृह मन्त्रीको जिम्मेदारी अनुसन्धानको दायरमा रहनुभएका माननीयलाई सुम्पिएपछि उहाँ प्रतिको झिनो आशाको भ्रम धुजा धुजा भएको छ’, पाण्डेले भन्नुभयो ।
सहकारी पीडित आन्दोलनमा रहिरहेको बेला सहकारी ठगीमा नै जोडिएका गृह मन्त्री हुँदा अनुसन्धान प्रभावित हुने उहाँले बताउनुभयो । ‘गृह मन्त्री नै अनुसन्धानको दायरमा हुनुले गम्भीर नैतिक प्रश्न खडा भएको छ भने अनुसन्धान नै प्रभावित हुने आशंका बढाएको छ’, उहाँले भन्नुभयो ।
यस्ता विषयमा प्रधानमन्त्रीले सदनमा उभिएर जवाफ दिनु पर्ने पाण्डेले बताउनुभयो । उहाँले यसमा सभामुखले रुलिङ जारी गर्नुपर्नेमा पाण्डेले जोड दिनुभयो ।
