काठमाडौं । प्रतिनिधि सभाको बैठक आज बस्दैछ ।
संघीय संसद् भवन नयाँ बानेश्वरमा बिहान ११ बजे बस्ने बैठकका लागि दुई वटा सम्भावित कार्यसूची तय गरिएकाे संसद् सचिवालयले जनाएकाे छ ।
बैठकमा शिक्षा, विज्ञान तथा प्रविधि मन्त्री सुमना श्रेष्ठले 'राष्ट्रिय सभामा उत्पत्ति भएको शहीद दशरथ चन्द स्वास्थ्य विज्ञान विश्वविद्यालय विधेयक, २०८० माथि विचार गरियोस्' भन्ने प्रस्ताव प्रस्तुत गर्नुहुनेछ ।
बैठकमा आगामी आर्थिक वर्ष २०८१-०८२ को लागि विनियोजन विधेयकका सिद्धान्त र प्राथमिकता सम्बन्धमा (कर प्रस्ताव बाहेक) छलफल हुने कार्यसूची रहेकाे संसद् सचिवालयले जनाएकाे छ ।
शुक्रबारकाे बैठक प्रमुख प्रतिपक्षी नेपाली कांग्रेसले अवरुद्ध गरेकाे थियाे । आजकाे बैठक पनि अवरुद्ध गर्ने कांग्रेसकाे तयारी छ । सहकारी ठगीकाे आराेप लागेका रास्वापका सभापति रवि लामिछानेलाई उपप्रधान तथा गृहमन्त्री नियुक्त गरिएकाे विषयमा कांग्रेसले प्रधानमन्त्री पुष्पकमल दाहाल प्रचण्डकाे जवाफ माग्दै आएकाे छ ।
