काठमाडौं । प्रतिनिधि सभाको आइतबारको बैठक प्रतिनिधि सभा सदस्य मञ्जु शर्मा अन्सारीको निधन भएकोमा शोक प्रस्ताव पारित गरेर सकिएकाे छ ।
प्रतिनिधि सभा बैठक सुरु हुने बित्तिकै सभामुख देवराज घिमिरेले शर्माको निधन भएकोमा सभामा शोक प्रस्ताव पेस गर्नुभएको थियो । सभामुखले पेस गर्नुभएको शोक प्रस्ताव सर्वसहमतिले पारित गरेको छ ।
शोक प्रस्ताव पारित गरेपछि प्रतिनिधि सभाले शर्माको सम्मानमा एक मिनेट मौन धारण गरेको थियो । त्यस पछि सभामुखले सोमबार बिहान ११ बजेसम्मको लागि प्रतिनिधि सभा बैठक स्थगित भएको घोषणा गर्नुभयो ।
२०२० साल माघ १९ गते जन्मनु भएकी शर्माको उपचारको क्रममा आइतबार काठमाडौंको सिभिल अस्पतालमा निधन भएको थियो । जनता समाजवादी पार्टीबाट समानुपातिक निर्वाचन प्रणालीबाट शर्मा प्रतिनिधि सभा सदस्य पदमा निर्वाचित हुनुभएको थियो ।
सो पार्टीबाट निर्वाचित समानुपातिक तर्फका प्रतिनिधि सभा सदस्य शहनाज रहमानको २०७९ फागुन १३ गते निधन भएपछि रिक्त रहेको स्थानमा २०७९ चैत १९ गते पार्टीले उहाँलाई मनोनीत गरेको थियो । उहाँ जनता समाजवादी पार्टीको पोलिटब्युरो सदस्य समेत हुनुहुन्थ्यो ।
