काठमाडाैं । सांसद्हरुले देशका विभिन्न ठाउँमा भएका आगलागीका घटनाप्रति सरकारकाे गम्भीर ध्यानाकर्षण गराएका छन् ।
साेमबार बसेकाे प्रतिनिधि सभा बैठककाे आकस्मिक र शून्य समयमा बाेल्दै सांसद्हरुले देशका विभिन्न ठाउँमा भएकाे आगलागीबाट भएकाे धनजनकाे क्षतिप्रति दु:ख व्यक्त गर्दै पीडितलाई तत्काल राहत र क्षतिपूर्ति दिन सरकारकाे ध्यानाकर्षण गराएका हुन् ।
नेकपा एमालेका सांसद् हेमराज राईले भाेजपुर, माेरङ, ताप्लेजुङ, रामेछाप, सिन्धुली, खाेटाङ, सुनसरी लगायत जिल्लामा करिब ६५-७० घरगाेठ जलेर नष्ट भएका र १० जनाकाे ज्यान गएकाे भन्दै दु:ख व्यक्त गर्नुभयाे । भाेजपुरमा आगलागीबाट ३ बालबालिकाकाे ज्यान गएकाे उहाँले बताउनुभयाे । उदयपुरमा भएकाे दुर्घटनामा ज्यान गुमाउने ८ मध्ये ७ जना भाेजपुरका नागरिक भएका भन्दै सांसद् राईले साे दुर्घटनाकाे घाउ भाेगिरहेकै बेला हतुवागढी र टक्सारमा आगलागी हुँदा धनजनकाे क्षति भएकाे बताउनुभयाे । आगलागीकाे घटनाले भाेजपुर मर्माहत भएकाे बताउनुभयाे । देशभर भइरहेकाे आगलागीबाट भएकाे धनजनकाे क्षतिप्रति गम्भीर बन्दै पीडितलाई क्षतिपूर्ति दिन सरकारसँग माग गर्नुभयाे ।
शून्य समयमा बाेल्दै एमालेकै सांसद् ठाकुर गैरेले गर्मी बढ्दै जाँदा आगलागी र डठेलाेकाे डरलाग्दा घटना सार्वजनिक भएका बताउनुभयाे । नेपालका सबै वनहरु आगलागीकाे अन्त्यन्त खतरामा रहेकाे भन्दै उहाँले जसका कारण वन्यजन्तु र प्राकृतिक सम्पदाकाे विनास हुन सक्ने बताउनुभयाे । सरकार, जनप्रतिनिधि, नागरिक समाज र प्रहरी आगलागी र डढेलाे नियन्त्रणका लागि सचेत हुनुपर्ने भन्दै सांसद् गैरले गर्मीसँगै आवाहुरीका घटना पनि बढ्ने बताउनुभयाे । जलवायु परिवर्तनका कारण नेपाल निक्कै प्रभावित भइरहेकाे उहाँले बताउनुभयाे ।
रास्वापाका सांसद् अशाेककुमार चाैधरीले सुनसरीकाे बर्जुमा भएकाे आगलागीमा २७ घर, माेरङमा २२ घर, तेह्रथुम, भाेजपुर र पाँचथरमा घर तथा गाेदाम गरी ३५ घर जलेर नष्ट भएका बताउनुभयाे । भाेजपुरमा ३ बालबालिकाकाे ज्यान गएकाे, पीडितहरुकाे सबै अन्नपात समेत जलेकाे, भन्दै उहाँले आगलागीका घटना राेक्न सरकारकाे ध्यानाकर्षण गर्नुभयाे । आगलागीका घटना स्थानीय स्तरबाट मात्रै राेक्न गाह्राे हुने भन्दै सांसद् चाैधरीले केन्द्र सरकार मातहतका राष्ट्रिय विपद् न्युनिकरण प्राधिकरण लगायत अन्य निकाय र संयन्त्रलाई खटाएर तत्कालै राहत र उद्धारका काम गर्न सरकारकाे ध्यानाकर्षण गराउनुभयाे ।
