काठमाडाैं । नेपाली कांग्रेसका सांसद् विनोदकुमार चौधरीले बाँसबारी छालाजुत्ता कारखानाकाे जग्गाकाण्डबारे सदनमा बाेल्नुभएकाे छ ।
साेमबार बसेकाे प्रतिनिधि सभा बैठकमा बिनियाेजन विधेयकका सिद्धान्त र प्राथमिकतामाथिकाे छलफलमा भाग लिँदै सांसद् चौधरीले अदालतमा विचाराधीन रहेकाे साे विषयबारे बाेल्नुभएकाे हाे ।
बाँसबारी छाला जुत्ता कारखानाको जग्गाकाण्डमा विनोद चौधरीलाई बयानका लागि बोलाउन उपप्रधान तथा गृहमन्त्री रवि लामिछानेले निर्देशन दिएकै भाेलिपल्ट सांसद् चाैधरीले आफू जाेडिएकाे निजी विषयमा सदनबाटै स्पष्टिकरण दिनुभएकाे हाे । निजीकरण सम्बन्धी तत्कालीन कानुन बमोजिम बाँसबारी छालाजुत्ता कारखानाको जग्गा हस्तान्तरण गर्ने निर्णय तत्कालीन सरकारले गरेको उहाँले दाबी गर्नुभयाे ।
प्रजातन्त्र पुनर्स्थापनापछि तत्कालीन सरकारले खुला बजार अर्थतन्त्र, निजीकरण र आर्थिक उदारीकरणमा जाने आर्थिक नीति अबलम्वन गरेपछि राज्यको स्वामित्वमा रहेका संस्थानहरूको निजीकरण प्रक्रिया सुरू भएकाे उहाँले दाबी गर्नुभयाे ।
सरकार आफैंले चलाइरहेका उद्योग सञ्चालनमा ब्यहोर्नुपरेको आर्थिक भारलाई क्रमशः घटाउँदै लैजाने उद्देश्यले प्रथम चरणमा बाँसबारी छालाजुत्ता कारखाना, भृकुटी कागज कारखाना र हरिसिद्धि इट्टा टायल कारखाना गरी ३ वटा सरकारी उद्योगको निजीकरण गर्ने निर्णय सरकारले गरेकाे उहाँकाे दाबी थियाे ।
बाँसबारी छालाजुत्ता कारखानासँगै च्याम्पियन फुटवेयरमा कारखानाको नाममा रहेको २५ प्रतिशत शेयर समेत लिलामीमार्फत बिक्री गर्ने तत्कालीन सरकारको निर्णयानुसार लिलामीकाे दोस्रो सूचनामा उत्कृष्ट प्रस्ताव पेस गर्ने सेयर धनीलाई प्रचलित निजीकरण सम्बन्धी कानुन बमोजिम हस्तान्तरण भएकाे उहाँले दाबी गर्नुभयाे । सांसद् चाैधरीले नितान्त आर्थिक विषयलाई राजनीतिकरण गर्नु दु:खद भएकाे बताउनुभयाे । विगत ४५ वर्षदेखि आफू नेपाललाई आर्थिक रुपमा सम्पन्न बनाउने अभियानमा सक्रिय रहेकाे भन्दै सांसद् चाैधरीले आफ्नाे उद्याेग व्यवसायका माध्यमबाट हाेस्, निजी क्षेत्रका नेतृत्वदायी संस्थाबाट हाेस् वा राजनीतिका माध्यमबाट आफ्नाे एक मात्र उद्देश्य नेपाललाई आर्थिक रुपमा सम्पन्न मुलुकका रुपमा स्थापित गर्नु रहेकाे बताउनुभयाे ।
आफ्नाे जीवनकाल विकास केन्द्रित अभियानमा बिताएकाे भन्दै उहाँले यसलाई पार्टीगत रुपमा विराेध वा समर्थनकाे विषय बनाउन नहुने बताउनुभयाे । जनताले आफूलाई निर्वाचित गर्नुकाे पछाडि पनि आफ्नाे विकासप्रतिकाे प्रतिबद्धता रहेकाे सांसद् चाैधरीले दाबी गर्नुभयाे ।
आर्थिक विकासका लागि आफूले २० वर्षकाे अवधिमा धेरै काम गरेकाे उहाँले बताउनुभयाे । नेपाललाई आर्थिक रुपमा सम्पन्न मुलुकका रुपमा विकास गर्ने अभियानमा आफू सक्रिय रहेकाे सांसद् चाैधरीले बताउनुभयाे ।
