काठमाडाैं । प्रतिनिधि सभाको बैठक आज बस्दैछ ।
संघीय संसद् भवन नयाँ बानेश्वरमा बिहान ११ बजे बस्ने बैठकमा बैठकमा प्रधानमन्त्री पुष्पकमल दाहाल प्रचण्डले सांसद्हरुकाे प्रश्नकाे जवाफ दिनुहुने कार्यसूची छ । प्रधानमन्त्रीले प्रतिनिधि सभा नियमावली २०७९ को परिच्छेद ९ बमोजिम सांसद्हरुले सोधेका प्रश्नको जवाफ दिने कार्यसूची रहेको संसद् सचिवालयले जनाएकाे छ ।
प्रधानमन्त्री प्रचण्डले यसअघि फागुन ६ गते सांसद्ले राखेका प्रश्नको जवाफ दिनुभएकाे थियाे । राष्ट्रिय सरोकारका विषयमा हरेक महिनाकाे पहिलो साता सदनमा प्रधानमन्त्रीसँग प्रश्नोत्तर कार्यक्रम सञ्चालन गर्ने प्रतिनिधि सभा नियमावलीमा उल्लेख छ । प्रधानमन्त्रीसँग प्रश्नोत्तरअन्तर्गत संसद् सचिवालयबाट स्वीकृत प्रश्न मात्रै सांसद्ले प्रधानमन्त्रीलाई सोध्न पाउने प्रावधान छ । जसअनुसार सांसद्हरुले पहिले नै संसद् सचिवालयमा प्रश्न टिपाउनुपर्छ ।
बैठकमा अर्थमन्त्री बर्षमान पुनले 'भन्सार विधेयक, २०८० माथि विचार गरियोस्' भन्ने प्रस्ताव प्रस्तुत गर्नुहुने सम्भावित कार्यसूची छ ।
बैठकमा आगामी आर्थिक वर्ष २०८१-८२ का लागि विनियोजन विधेयकका सिद्धान्त र प्राथमिकता सबन्धमा (कर प्रस्तावबाहेक) माथि छलफल जारी रहने सम्भावित कार्यसूची पनि रहेकाे संसद् सचिवालयले जनाएकाे छ ।
