काठमाडाैं । प्रधानमन्त्री पुष्पकमल दाहाल प्रचण्डले उपप्रधान तथा गृहमन्त्री रवि लामिछानेले सहकारीकाे बचत हिनामिना गरेको प्रमाण कतै नभेटिएको बताउनुभएकाे छ ।
मंगलबार बसेकाे प्रतिनिधि सभा बैठकमा सांसद्का प्रश्नकाे जवाफ दिने क्रममा प्रधानमन्त्री प्रचण्डले गृहमन्त्री लामिछाने कुनै पनि सहकारीकाे सञ्चालक समिति, लेखा समिति, कुनै पनि जिम्मेवारी र भूमिकामा नरहेकाे र कुनै पनि मुद्दामा जाेडिएकाे नदेखिएकाे बताउनुभयाे । उहाँले भन्नुभयाे - 'हालसम्मको अनुसन्धानले उहाँ सहकारीको सञ्चालक समिति, लेखा समिति, ऋण समिति, कर्मचारीलगायत कुनै पनि जिम्मेवारी र भूमिकामा नरहेको र अदालतमा विचाराधीन मुद्दामा पनि कहीँ कतै जोडिएको देखिएको छैन ।'
सूर्यदर्शन सहकारीकाे जाहेरीमा कसैकाे नाम नकिटिएकाे पाइएकाे भन्दै प्रधानमन्त्री प्रचण्डले १९ जनालाई प्रतिवादी कायम गरी मुद्दा दायर भएकाे बताउनुभयाे । तीमध्ये ४ जना पक्राउ परेकाे र अरुकाे खाेजी भइरहेकाे उहाँले बताउनुभयाे ।
मूल उजुरीपछि दिएकाे पूरक उजुरीमा रवि लामिछानेलाई विपक्षी बनाइएकाे पाइएकाे प्रधानमन्त्री प्रचण्डले बताउनुभयाे । लामिछानेविरुद्ध परेको जाहेरीमा पनि कुनै प्रमाण र आधार नभेटिएको दाबी गर्दै उहाँले भन्नुभयाे - 'उक्त जाहेरिमा सहकारी हिनामिनामा मुछिएको कुनै प्रमाण र आधार छैन, यस्तो प्रमाण र आधारबिनाको जाहेरी दर्ता गर्नु आवश्यक नै हुँदैन ।'
याे विषय पहिला नै टुंगिएकाे र त्यतिबेलाकाे सरकारमा अहिलेकाे प्रतिपक्ष पनि रहेकाे उहाँले बताउनुभयाे । लामिछानेकाे पार्टी सरकार सहभागी भएपनि स्वयम् प्रतिपक्षले सहकारीकाे विषय उठाइरहेकाे भन्दै प्रधानमन्त्री प्रचण्डले यसलाई राजनीतिकरण नगर्न आग्रह गर्नुभयाे ।
अनुसन्धानबाट केही कैफियत देखिएमा उहाँलाई कारबाही गरिने पनि उहाँले बताउनुभयाे । ठाडाे उजुरी दिनासाथ राजीनामा दिने हाे भने यसमा सहमति गर्न सक्नुहुन्छ भन्ने प्रश्न समेत प्रधानमन्त्रीले गर्नुभयाे ।
सरकारकाे पहिलाे प्राथमिकता सुशासन भएकाे भन्दै उहाँले आफूले सुशासनकाे संकल्प लिएकै कारण विभिन्न काण्डकाे छानबिन अगाडि बढाइरहेकाे बताउनुभयाे । यी काण्डमा दाेषी जाेसुकै भएपनि नछुटाेस् र निर्दाेष नपराेस् भन्ने मान्यतालाई दृढतापूर्व पालना गरिरहेकाे उहाँले बताउनुभयाे । भ्रष्टाचारको अभियानमा कसैलाई काखा कसैलाई पाखा गरेको छैन भन्ने कुरा पछिल्ला तथ्यांकले पनि पुष्टि गरिरहेका प्रधानमन्त्री प्रचण्डले बताउनुभयाे ।
